ຊາວນະຄອນຫຼວງວຽງຈັນ ຕ້ອງປະຕິບັດ 6 ຂໍ້ຫ້າມ ໄລຍະການຫຼິ້ນບຸນປີໃໝ່ລາວ

ຊາວນະຄອນຫຼວງວຽງຈັນ ຕ້ອງປະຕິບັດ 6 ຂໍ້ຫ້າມ ໄລຍະການຫຼິ້ນບຸນປີໃໝ່ລາວ

ພັທ ຈັນທະບູນ ມະນີວົງ ຮອງຫົວໜ້າຫ້ອງຕຳຫຼວດ ປກສ ນະຄອນຫຼວງວຽງຈັນ ໄດ້ໃຫ້ສຳພາດຕໍ່ນັກຂ່າວ ປກສ ນວ ໃນວັນທີ 11 ເມສາ 2022 ວ່າ: ໂດຍປະຕິບັດຕາມທິດຂອງກອງບັນຊາ ປກສ ນະຄອນຫຼວງວຽງຈັນ ຫ້ອງຕຳຫຼວດ ໄດ້ສ້າງແຜນປ້ອງກັນບຸນປີໃໝ່ລາວປະຈຳປີ ພສ 2565 ໃນນີ້ ໄດ້ບັນຈຸກໍາລັງຕຳຫຼວດຈະລາຈອນລົງປະຈໍາຈຸດ 529 ສະຫາຍ, ປະຈໍາຢູ່ 8 ດ່ານ

ເພື່ອແນໃສ່ເຮັດໃຫ້ ການຫຼິ້ນບຸນປີໃໝ່ລາວປີນີ້ ຖືກຕ້ອງຕາມມຮີດຄອງປະເພນີ, ວັດທະນະທຳອັນດີງາມຂອງຊາດລາວ ແລະ ຮຽກຮ້ອງໃຫ້ຊາວນະຄອນຫຼວງວຽງຈັນ ເອົາໃຈໃສ່ປະຕິບັດ 6 ຂໍ້ຫ້າມຕາມຄຳສັ່ງເລກທີ 04/ຈນວ, ລົງວັນທີ 31 ມີນາ 2022 ວ່າດ້ວຍການຮັກສາຄວາມສະຫງົບຄວາມເປັນລະບຽບຮຽບຮ້ອຍ ໃນໄລຍະສະຫຼອງປີໃໝ່ລາວຂອງເຈົ້າຄອງນະຄອນຫຼວງວຽງຈັນ ໄດ້ວາງອອກ:


1. ຫ້າມອົງການຈັດຕັ້ງຂອງລັດ, ເອກະຊົນ ແລະ ສັງຄົມຢູ່ ນະຄອນຫຼວງວຽງຈັນ ຈັດງານລ້ຽງ-ງານອວຍພອນປີໃໝ່ລາວປະຈຳປີ ພສ 2565 ເພື່ອປ້ອງກັນການຕິດເຊື້ອ ແລະ ແຜ່ເຊື້ອພະຍາດໂຄວິດ-19 ໃຫ້ມີຄວາມເຂັ້ມງວດ ທັງເປັນການບໍ່ຟຶມເຟືອຍ.

2. ຫ້າມຈັດຄອນເສີດ, ເປີດເຄື່ອງຂະຫຍາຍສຽງ ຫຼື ເສບດົນຕີ ແລະ ສະແດງສິລະປະດົນຕີກາງແຈ້ງ ຢູ່ຕາມສະຖານທີ່ຕ່າງໆເຊັ່ນ: ບໍລິເວນອ້ອມຮອບວັດວາອາຣາມ, ສະຖານທີ່ທ່ອງທ່ຽວ, ສວນອາຫານ, ສວນນ້ຳ, ຣີສອດ, ຫາດແຄມນ້ຳງື່ມ-ນ້ຳຂອງ, ຕາມແຄມຖະໜົນຫົນທາງ ລວມທັງ ງານປະກວດນາງສັງຂານ, ງານແຫ່ນາງສັງຂານ ແລະ ງານອື່ນໆ ທີ່ເຕົ້າໂຮມຄົນເປັນຈຳນວນຫຼວງຫຼາຍ.


3. ຫ້າມຫົດສາດນ້ຳສີ, ນ້ຳເປື້ອນ, ນ້ຳຄັນ ແລະ ນຳໃຊ້ພາຫະນະເລາະສາດນ້ຳໃສ່ກັນຕາມຖະໜົນຫົນທາງ, ຮ່າຍນໍ້າໃສ່ຖົງຢາງ ຫຼື ພາຊະນະອື່ນໆ ເພື່ອດຶກແກ່ວງໃສ່ກັນ.

4. ຫ້າມນຸ່ງເຄື່ອງໂປ້ເປືອຍ ແລະ ປະພຶດລາມົກອານາຈານ ຢູ່ຕາມວັດວາອາຣາມ, ສະຖານທີ່ສັກກະລະບູຊາ ແລະ ສະຖານທີ່ສາທາລະນະຕ່າງໆ.

5. ຫ້າມຜູ້ດື່ມເຄື່ອງດື່ມທີ່ມີທາດເຫຼົ້າ ແລະ ເສບສິ່ງມຶນເມົາຂັບຂີ່ລົດ, ຜູ້ຂັບລົດບໍ່ໃຫ້ດື່ມເຄື່ອງດື່ມທີ່ມີທາດເຫຼົ້າ ແລະ ເສບສິ່ງມຶນເມົາ (ດື່ມບໍ່ຂັບ-ຂັບບໍ່ດື່ມ)
6. ຫ້າມຈູດໝາກກະໂພກ, ກໍ່ໃຫ້ເກີດສຽງແຕກ ແລະ ເປີດສຽງດົນຕີເນື່ອງນັນຜູ້ອື່ນ.

ຂໍ້ມູນຈາກ: ປກສ.ນະຄອນຫລວງ

ข่าวทั่วไป