ເລີ່ມມີຄວາມຫວັງ…ຫຼັງລາຄານ້ຳມັນ ແລະ ຄຳ ໃນຕະຫຼາດໂລກຫຼຸດລົງ

ເລີ່ມມີຄວາມຫວັງ…ຫຼັງລາຄານ້ຳມັນ ແລະ ຄຳ ໃນຕະຫຼາດໂລກຫຼຸດລົງ

ມີລາຍງານວ່າລາຄານໍ້າມັນເຊື້ອໄຟປັບຕົວຫຼຸດລົງ 13%, ຫຼັງຈາກຣັສເຊຍ ແລະຢູເຄຣນ ຍັງຄົງມີແຜນເຈລະຈາຕໍ່ເນື່ອງເພື່ອຢຸດຕິຄວາມ ຂັດແຍ່ງ, ຂະນະທີ່ສະຫະລັດອາຣັບເອມິເຣຕສ໌(ຢູເອອີ) ກໍເຫັນພ້ອມທີ່ຈະ ເພີ່ມກໍາລັງການຜະລິດນໍ້າມັນອອກສູ່ຕະຫຼາດໂລກເພື່ອຫຼຸດຜ່ອນຄວາມ ວຸ້ນວາຍຂອງຕະຫຼາດພະລັງງານ.

ທາງດ້ານຕະຫຼາດຫຸ້ນທົ່ວໂລກກໍ່ປັບຕົວ ສູງຂຶ້ນ, ສ່ວນລາຄາຄຳໃນຕະຫຼາດໂລກກໍ່ປັບຕົວຫຼຸດລົງ 3%.ອີງຕາມລາຍງານຂອງສຳນັກຂ່າວຕ່າງປະເທດໃນວັນທີ 10 ມີນາ 2022 ລະບຸວ່າລາຄານໍ້າມັນໃນຕະຫຼາດໂລກປັບຕົວຫຼຸດລົງຫຼາຍສຸດໃນ ຮອບ 2ປີ, ຫຼັງຈາກທີ່ ຢູເອອີ ໃຫ້ຄຳໝັ້ນວ່າຈະສະໜັບສະໜູນອົງການກຸ່ມ ປະເທດຜູ້ສົ່ງອອກນໍ້າມັນ ຫຼືໂອເປຄ ໃຫ້ພິຈາລະນາເພີ່ມກຳລັງການຜະລິດ ຫຼາຍຂຶ້ນ.

ໂດຍລາຄານໍ້າມັນດິບ ເບຣນຕ໌ ປັບຕົວລົງເຖິງ 16,84 ໂດລາ ສະຫະລັດຕໍ່ບາຣເຣລ ຫຼືຄິດເປັນ 13% ມາຢູ່ທີ່ 111,14 ໂດລາຕໍ່ ບາຣ໌ເຣລ, ນັບເປັນການປັບຕົວຫຼຸດລົງຫຼາຍທີ່ສຸດໃນຮອບ 1 ວັນນັບມາ ຕັ້ງແຕ່ 21 ເມສາ 2020. ຂະນະທີ່ນໍ້າມັນເວສຕ໌ເທຶກຊັສ ກໍປັບຕົວລົງ 15,44 ໂດລາ ຫຼື 15,2% ມາຢູ່ທີ່108,7ໂດລາຕໍ່ບາຣ໌ເຣລ.

ດ້ານຕະຫຼາດຫຸ້ນ ວອລສະຕຣີທ ຂອງສະຫະລັດ ກໍ່ປັບຕົວຂຶ້ນທັງໝົດ, ຫຼັງຈາກທີ່ທ່ານ ເຊຣ໌ເກຣາຟຣອຟລັດຖະມົນຕີກະຊວງການຕ່າງປະເທດ ຣັສເຊຍ, ມີກໍານົດຫາລືກັບທ່ານ ດິມີໂຕຣ ຄູເລບາ ລັດຖະມົນຕີກະຊວງ ການຕ່າງປະເທດຢູເຄຣນ ທີ່ປະເທດຕຸຣະກີ ໃນມື້ນີ້.ຊຶ່ງດັດຊະນີ ເອັມເອສ ຊີໄອ ດັດຊະນີຈາກຕະຫຼາດຫຸ້ນ 50 ປະເທດທົ່ວໂລກ ກໍ່ປັບຕົວສູງຂຶ້ນ 2,6%. ຂະນະທີ່ດັດຊະນີອຸດສາຫະກຳດາວໂຈນສ໌, ເອສແອນດ໌ພີ500 ແລະ ແນສແດກກໍ່ປັບຕົວສູງຂຶ້ນເຊັ່ນກັນ.

ທາງດ້ານຕະຫຼາດຫຸ້ນ STOXX 600 ຂອງຢຸໂຣປ ກໍ່ປັບຕົວສູງຂຶ້ນ 4,68%.ສ່ວນລາຄາອັນຍະມະນີປະເພດຄຳໃນຕະຫຼາດໂລກ, ຫຼັງຈາກທີ່ປັບຕົວຂຶ້ນ ທະລຸ 2.000 ໂດລາສະຫະລັດຕໍ່ອອນຊ໌ໃນມື້ວານນີ້; ຫຼ້າສຸດກໍປັບຕົວລົງ 3% ມາຢູ່ທີ່ 1.991,49 ໂດລາຕໍ່ອອນຊ໌

ຂໍ້ມູນ: ເສດຖະກິດ-ສັງຄົມ

ข่าวทั่วไป