ປກສ ເມືອງນາຊາຍທອງ ກັກຕົວເປົ້າໝາຍ 2 ຄົນ ພ້ອມຂອງກາງ 4.696 ເມັດ

ປກສ ເມືອງນາຊາຍທອງ ກັກຕົວເປົ້າໝາຍ 2 ຄົນ ພ້ອມຂອງກາງ 4.696 ເມັດ

ພັທ ບຸນມີ ກັນຕີຍາວົງ ຮອງຫົວໜ້າ ກອງບັນຊາການ ປກສ ເມືອງນາຊາຍທອງ ນວ ໃຫ້ຮູ້ວ່າ: ວັນທີ 28 ກຸມພາ 2022 ໄດ້ກັກຕົວເປົ້າໝາຍຄ້າຂາຍຢາເສບຕິດຄື: ທ້າວ ບຸນລອດ ອາຍຸ 45 ປີ ປະຊາຊົນຢູ່ບ້ານ ສີວິໄລ ເມືອງນາຊາຍທອງ ພ້ອມຂອງກາງຢາບ້າ 4.658 ເມັດ ແລະ ນາງ ອອນ ອາຍຸ 38 ປີ ປະຊາຊົນ ຢູ່ບ້ານ ສິວີໄລ ເມືອງນາຊາຍທອງ ພ້ອມຂອງກາງຢາບ້າ 34 ເມັດ ມາດໍາເນີນຄະດີ.

ຜ່ານການສອບສວນຂອງເຈົ້າໜ້າທີ່ ທ້າວ ບຸນລອດ ໃຫ້ການຮັບສາລະພາບວ່າ: ຕົນເອງໄດ້ເລີ່ມເສບຢາບ້າມາແຕ່ປີ 2017 ພໍເດືອນ ມັງກອນ ປີ 2022, ຕົນເອງໄດ້ພົວພັນຄ້າ-ຂາຍຢາເສບຕິດ ປະເພດຢາບ້າທີ່ນໍາມາຂາຍແຕ່ລະຄັ້ງນັ້ນ ຊື້ນໍາຊາຍຄົນໜຶ່ງຢູ່ບ້ານ ໜອງນາກ ເມືອງໂພນໂຮງ ແຂວງວຽງຈັນ ພາຍຫຼັງໄດ້ຢາບ້າມາແລ້ວກໍເອົາໄປຂາຍໃຫ້ກຸ່ມຄົນ ທີ່ຕ້ອງການຊື້ ຕົກມາຮອດວັນທີ 27 ກຸມພາ 2022, ໄດ້ຊື້ຢາບ້ານໍາຊາຍຄົນດັ່ງກ່າວອີກ 4.000 ເມັດ ຈາກນັ້ນວັນທີ 28 ກຸມພາ 2022, ກໍຖືກເຈົ້າໜ້າທີ່ເຂົ້າກັກຕົວ ພ້ອມຂອງກາງຢາບ້າທັງໝົດ 4.658 ເມັດ.

ສ່ວນ ນາງ ອອນ ໃຫ້ການຮັບສາລະພາບວ່າ: ຜ່ານມາໄດ້ຊື້ຢາບ້ານໍາ ທ້າວ ບຸນລອດ ມາແລ້ວ 9 ຄັ້ງ, ຄັ້ງສຸດທ້າຍແມ່ນວັນ 28 ກຸມພາ 2022 ຈໍານວນ 50 ເມັດ ແລະ ໄດ້ຂາຍໄປແລ້ວ 16 ເມັດ ຍັງເຫຼືອ 34 ເມັດ, ກ່ອນຖືກເຈົ້າໜ້າທີ່ກັກຕົວ, ປັດຈຸບັນ ເຈົ້າໜ້າທີ່ພວມເລັ່ງສືບສວນ-ສອບສວນ ເພື່ອຂະຫຍາຍຜົນ ຊອກຫາກຸ່ມແກ້ງທີ່ຮ່ວມຂະບວນການມາດໍາເນີນຄະດີຕາມລະບຽບກົດໝາຍ.

ຂ່າວ ປກສ ນວ

ข่าวทั่วไป