ຊີ້ແຈງຄືນກ່ຽວກັບແຈ້ງການຂອງຫ້ອງວ່າການກະຊວງປ້ອງກັນຄວາມສະຫງົບສະບັບ ເລກທີ 0097/ຫວກ, ລົງວັນທີ 25 ກຸມພາ

ຊີ້ແຈງຄືນກ່ຽວກັບແຈ້ງການຂອງຫ້ອງວ່າການກະຊວງປ້ອງກັນຄວາມສະຫງົບສະບັບ ເລກທີ 0097/ຫວກ, ລົງວັນທີ 25 ກຸມພາ

” ໜັງສືແຈ້ງການ ” ໜັງສືຊີ້ແຈງ ສະບັບເລກທີ 0100/ຫວກ ນະຄອນຫຼວງວຽງຈັນ, ວັນທີ 1 ມີນາ 2022;
ເຖິງ: ບັນດາກົມກອງອ້ອມຂ້າງ ກະຊວງ, ກອງບັນຊາການ ປກສ ນະຄອນຫຼວງວຽງຈັນ, ກອງບັນຊາການ ປກສ ແຂວງທົ່ວປະເທດ, ຕະຫຼອດຮອດທຸກ ພາກສ່ວນໃນສັງຄົມ.

ເລື່ອງ: ຂໍຊີ້ແຈງຄືນກ່ຽວກັບແຈ້ງການຂອງຫ້ອງວ່າການກະຊວງປ້ອງກັນຄວາມສະຫງົບສະບັບ ເລກທີ 0097/ຫວກ, ລົງວັນທີ 25 ກຸມພາ 2022.

ຫ້ອງວ່າການກະຊວງປ້ອງກັນຄວາມສະຫງົບ ຕາງໜ້າໃຫ້ແກ່ກຳລັງປ້ອງກັນຄວາມສະຫງົບ ປະຊາຊົນລາວ ຂໍຖືເປັນກຽດຊີ້ແຈງຄວາມເປັນຈິງມາຍັງ ບັນດາກົມກອງທັງສູນກາງ ແລະ ທ້ອງຖິ່ນ, ຕະຫຼອດຮອດທຸກພາກສ່ວນໃນສັງຄົມ ໃຫ້ມີຄວາມເຂົ້າໃຈທີ່ຖືກຕ້ອງ ແລະ ຮັບຊາບທົ່ວເຖິງກັນວ່າ:

ໃນໄລຍະຜ່ານມາ ກຳລັງປ້ອງກັນຄວາມສະຫງົບ ໄດ້ສຸມກຳລັງເຂົ້າໃນການປ້ອງກັນ, ສະກັດກັ້ນ, ຄວບຄຸມ ແລະ ແກ້ໄຂການແຜ່ລະບາດຂອງພະຍາດໂຄວິດ-19 ເຊິ່ງເຮັດ ໃຫ້ກຳລັງປ້ອງກັນຈຳນວນບໍ່ໜ້ອຍ ໄດ້ຮັບຜົນກະທົບຈາກການແຜ່ລະບາດຂອງພະຍາດດັ່ງກ່າວ;

ເພື່ອເປັນການນຳເອົາ ກຳລັງດັ່ງກ່າວກັບຄືນມາປະຕິບັດໜ້າທີ່ເປັນປົກກະຕິ ແລະ ໃນປັດຈຸບັນ ກໍຄືໃນຕໍ່ໜ້າ ກຳລັງປ້ອງກັນຄວາມສະຫງົບ ກໍພວມສຸມໃສ່ຈັດຕັ້ງປະຕິບັດວາລະແຫ່ງຊາດວ່າດ້ວຍການການແກ້ໄຂບັນຫາຢາເສບຕິດ ( ປີ 2021-2023 ), ການກະກຽມການສະເຫຼີມສະຫຼອງວັນສ້າງຕັ້ງພັກ ຄົບຮອບ 67 ປີ, ວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 61 ປີ, ບຸນປີໃໝ່ລາວ ແລະ ວັນສຳຄັນຕ່າງໆຂອງພັກ, ຂອງຊາດທີ່ຈະມາເຖິງ.

ສະນັ້ນ, ກະຊວງປ້ອງກັນຄວາມສະຫງົບ ຈຶ່ງໄດ້ອອກແຈ້ງການສະບັບ ເລກທີ 0097/ຫວກ, ລົງວັນທີ 25 ກຸມພາ 2022 ກ່ຽວກັບການເພີ່ມທະວີວຽກງານປະຈຳການກຽມພ້ອມສູ້ຮົບ ແນໃສ່ເພີ່ມທະວີຄວາມເອົາໃຈໃສ່ຕໍ່ວຽກງານປະຈຳການ ເພື່ອກຽມພ້ອມປະຕິບັດໜ້າທີ່ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຂອງສັງຄົມ ແລະ ແກ້ໄຂເຫດການຕ່າງໆ ທີ່ອາດ ຈະເກີດຂຶ້ນ;


ເຊິ່ງການອອກແຈ້ງການສະບັບດັ່ງກ່າວ ເຖິງບັນດາກົມກອງ, ເຫຼົ່າວິຊາສະເພາະນັ້ນ ມັນແມ່ນວຽກງານ, ແມ່ນລະບອບການຊີ້ນຳ-ບັນຊາ ໃນກຳລັງປ້ອງກັນຄວາມສະຫງົບຢ່າງເປັນປົກກະຕິ ໃນແຕ່ລະໄລຍະ ເພື່ອຍົກສູງສະຕິຄວາມຮັບຜິດຊອບ ໃນການຈັດຕັ້ງປະຕິບັດວຽກງານປະຈຳການພາຍໃນກຳລັງປ້ອງກັນຄວາມສະຫງົບ.

ສ່ວນກໍລະນີການນຳເອົາໜັງສືພິມທາງລັດຖະການສະບັບດັ່ງກ່າວ ລົງສື່ສັງຄົມອອນລາຍໂດຍບໍ່ໄດ້ຮັບອະນຸຍາດ, ເຮັດໃຫ້ສັງຄົມເກີດຄວາມສັບສົນ, ນໍາສະເໜີທັດສະນະຕ່າງໆທີ່ບໍ່ແທດເໝາະກັບຄວາມເປັນຈິງ ກະຊວງປ້ອງກັນຄວາມສະຫງົບ ຈະໄດ້ດຳເນີນການກວດກາ, ປະຕິບັດຕາມກົດໝາຍ, ລະບຽບການ ແລະ ຂໍ້ຫ້າມຂອງກຳລັງປ້ອງກັນຄວາມສະຫງົບ.

ດັ່ງນັ້ນ, ຫ້ອງວ່າການກະຊວງປ້ອງກັນຄວາມສະຫງົບ ຈຶ່ງແຈ້ງມາຍັງທ່ານ ເພື່ອຊາບຢ່າງທົ່ວເຖິງ ແລະ ຂໍຄວາມຮ່ວມມືຈາກທຸກພາກສ່ວນໃນສັງຄົມ ໃຫ້ຍົກສູງສະຕິໃນການ ບໍລິໂພກຂ່າວສານ ຜ່ານສື່ສັງຄົມອອນລາຍ.

ອ້າງອີງ: ຄວາມສະຫງົບ

ข่าวทั่วไป