ເມືອງລອງ ລົງທຳລາຍສວນຝິ່ນ ຫຼາຍກວ່າ 53 ເຮັກຕາ

ເມືອງລອງ ລົງທຳລາຍສວນຝິ່ນ ຫຼາຍກວ່າ 53 ເຮັກຕາ

ຕາມການໃຫ້ຂໍ້ມູນຂອງເຈົ້າໜ້າທີ ປກສ ເມືອງລອງ ແຂວງຫຼວງນໍ້າທາ ໃຫ້ຮູ້ວ່າ: ວັນທີ 30 ມັງກອນ-19 ກຸມພາ 2022 ກອງບັນຊາການ ປກສ ເມືອງລອງ ແຂວງຫຼວງນໍ້າທາ ໄດ້ລົງສົມທົບກັບອົງການຈັດຕັ້ງທຸກພາກສ່ວນ ເຂົ້າທຳລາຍສວນຝີ່ນທີ່ ປະຊາຊົນລັກລອບປູກຢູ່ຂອບເຂດ ເມືອງລອງ ແຂວງຫຼວງນໍ້າທາ ໂດຍການນໍາພາຂອງ ພັທ ສິງຄຳ ອຸດົມພອນ ຮອງຫົວໜ້າຫ້ອງຕຳຫຼວດ ປກສ ແຂວງຫຼວງນໍ້າທາ.


ສວນຝີ່ນທີ່ປະຊາຊົນລັກລອບປູກລວມມີ ກຸ່ມສົບໂຫຼຍ ມີ 06 ບ້ານ, ມີ 46 ຄອບຄົວ, ມີ 46 ຕອນ, ເນື້ອທີ່ 80.000 ຕາແມັດ; ກຸ່ມບວກບໍ ມີ 06 ບ້ານ, ມີ 30 ຄອບຄົວ, ມີ 30 ຕອນ, ເນື້ອທີ່ 40.000 ຕາແມັດ; ກຸ່ມສີວິໄລ ມີ 02 ບ້ານ, ມີ 48 ຄອບຄົວ, ມີ 48 ຕອນ, ເນື້ອທີ່ 255.000 ຕາແມັດ; ກຸ່ມຈົງກາ ມີ 04 ບ້ານ, ມີ 57 ຄອບຄົວ, ມີ 57 ຕອນ, ເນື້ອທີ່ 155.000 ຕາແມັດ. ລວມເນື້ອທີ່ສວນຝີ່ນທີ່ໄດ້ທຳລາຍຖິ້ມທັງໝົດ 530.000 ຕາແມັດ ຫຼື ເທົ່າກັບ 53 ເຮັກຕາ ທຽບໃສ່ປີຜ່ານມາຫຼຸດຫຼົງ 34 ເຮັກຕາ.


ພັທ ສິງຄຳ ອຸດົມພອນ ຮອງຫົວໜ້າຫ້ອງຕຳຫຼວດ ປກສ ແຂວງ ໃຫ້ຮູ້ຕື່ມອີກວ່າ: ວິທີການລົງທຳລາຍສວນໝາກຢາຝິ່ນໃນຊຸດນີ້ ແມ່ນໄດ້ຈັດແບ່ງເປັນທິມ ໃຊ້ເວລາ 10 ກວ່າວັນ ເນື່ອງຈາກວ່າຂອບເຂດພື້ນທີ່ທີປະຊາຊົນລັກລອບປູກ ແມ່ນຢູ່ເຂດຫ່າງໄກສອກຫຼີກກະແຈກ ກະຈາຍ.

ສ່ວນການທຳລາຍແມ່ນໃຊ້ວິທີເອົາໄມ້ຟາດ, ລົກຕົ້ນອ່ອນຖິ້ມ ເພື່ອບໍ່ໃຫ້ເຈົ້າຂອງສວນສາມາດເກັບກູ້ເອົາຜົນຜະລິດໄດ້ຕື່ມອີກ. ພາຍຫຼັງທຳລາຍສວນຝິ່ນແລ້ວ ກໍໄດ້ສ້າງບົດບັນທຶກ ສຶກສາອົບຮົມກ່າວເຕືອນ, ພ້ອມທັງ ເຊັນຢັ້ງຢືນຈາກອຳນາດການປົກຄອງບ້ານ ບໍ່ໃຫ້ສືບຕໍ່ລັກລອບປູກຝິ່ນຕື່ມອີກ.


ຮຕ ສຸລິພັນ
ນັກຂ່າວ ປກສ ເມືອງລອງ

ข่าวทั่วไป