ການສໍ້ລາດບັງຫຼວງ ຂອງພະນັກງານກະຊວງ ຍທຂ ແມ່ນໜຶ່ງໃນຫຼາຍບັນຫາທີ່ ທ່ານນາຍົກເນັ້ນໃຫ້ ເລັ່ງແກ້ໄຂ

ການສໍ້ລາດບັງຫຼວງ ຂອງພະນັກງານກະຊວງ ຍທຂ ແມ່ນໜຶ່ງໃນຫຼາຍບັນຫາທີ່ ທ່ານນາຍົກເນັ້ນໃຫ້ ເລັ່ງແກ້ໄຂ

ທ່ານ ພັນຄໍາ ວິພາວັນ ນາຍົກລັດຖະມົນຕີໄດ້ກ່າວເນັ້ນໃຫ້ ກະຊວງໂຍທາ ທິການ ແລະ ຂົນສົ່ງ (ຍທຂ) ທີ່ກອງປະຊຸມວຽກງານໂຍທາທິການ ແລະ ຂົນສົ່ງທີ່ໄດ້ຈັດຂຶ້ນເມື່ອວັນທີ 25 ກຸມພາ 2022 ທີ່ຜ່ານມາ ຢູ່ຫໍປະຊຸມແຫ່ງຊາດວ່າ: ຄຽງຄູ່ກັບຜົນສໍາເລັດຫຼາຍດ້ານ ຢາກໃຫ້ກະຊວງ ຍທຂ ເອົາໃຈໃສ່ວຽກງານຈຳນວນໜຶ່ງ ເປັນຕົ້ນ:

ວຽກງານການກໍ່ສ້າງປ້ອງກັນຕະຝັ່ງເຈື່ອນຕາມແມ່ນໍ້າຂອງ ແລະ ແມ່ນໍ້າເຫືອງ ໃຫ້ຈັດລຽງບູລິມະສິດ ແລະ ກໍານົດລະອຽດຈະແຈ້ງບັນດາຈຸດຕ່າງໆ; ກ່ຽວກັບການພັດທະນາຕົວເມືອງຕິດພັນກັບການພັດທະນາໂຄງລ່າງທີ່ທົນທານ ເປັນມິດກັບສິ່ງແວດລ້ອມ ກ້າວໄປສູ່ການສ້າງຕົວເມືອງ ທີ່ໜ້າຢູ່ ແລະ ທັນສະໄໝໃຫ້ເອົາໃຈໃສ່ ການຄົ້ນຄວ້າວາງແຜນ, ກໍານົດສ້າງບັນດານິຕິກຳ ແລະ ຄຸ້ມຄອງການພັດທະນາດັ່ງກ່າວໃຫ້ດີ, ຫຼີກລ້ຽງການສ້າງສຳເລັດແລ້ວ ໄດ້ທັບມ້າງ ຫຼື ປັບປຸງໃໝ່ເລື້ອຍໆ, ແຜນພັດທະນາ ຕ້ອງກົມກຽວກັນ (ເສັ້ນທາງ, ໄຟຟ້າ, ນໍ້າປະປາ…);

ການພັດທະນາຕາໜ່າງເສັ້ນທາງລົດໄຟ ແລະ ການໝູນໃຊ້ທ່າແຮງຂອງຕາໜ່າງເສັ້ນທາງລົດໄຟ ໃນການພັດທະນາເສດຖະກິດແຫ່ງຊາດ ຕ້ອງໄດ້ຄົ້ນຄວ້າ ຈະນໍາໃຊ້ທ່າແຮງແນວໃດ ໃຫ້ເກີດປະໂຫຍດສູງສຸດ ຈາກການຂົນສົ່ງ ແລະ ການບໍລິການ; ເອົາໃຈໃສ່ ສ້າງບຸກຄະລາກອນ ເພື່ອສາມາດຮັບປະກັນສືບຕໍ່ວຽກງານໃນຕໍ່ໜ້າ;

ນຳເອົາຄວາມຮູ້ ແລະ ບົດຮຽນຈາກການພັດທະນາລົດໄຟລາວ-ຈີນ ເປັນບົດຮຽນ ໃນການປັບປຸງ ແລະ ຖອດຖອນບົດຮຽນ ໃນການພັດທະນາຂະຫຍາຍຕາໜ່າງເສັ້ນທາງລົດໄຟ ທີ່ພວກເຮົາຈະພັດທະນາ ໃນອະນາຄົດ;

ຕ້ອງເປັນເຈົ້າການ ໃນການກຳນົດກົນໄກການຈັດຕັ້ງປະຕິບັດການຂົນສົ່ງຫຼາຍຮູບແບບ, ຫຼາຍວິທີ ໃຫ້ມີຄວາມກົມກຽວ ແລະ ໂລ່ງລ່ຽນ ໂດຍມີການສົມທົບແໜ້ນ ກັບຂະແໜງການ ແລະ ທ້ອງຖິ່ນທີ່ກ່ຽວຂ້ອງ ເພື່ອວາງແຜນພັດທະນາ ໃຫ້ສອດຄ່ອງກັບຄວາມຮຽກຮ້ອງຕ້ອງການອັນຈຳເປັນ ແລະ ເກີດຜົນປະໂຫຍດ ທາງດ້ານເສດຖະກິດ-ສັງຄົມ, ສ້າງແລ້ວ ມີປະສິດທິພາບ ແລະ ປະສິດທິຜົນ, ໄດ້ຮັບຜົນຕອບແທນ ທີ່ກຸ້ມຄ່າກັບການລົງທຶນ.


ນອກນັ້ນທ່ານນາຍົກຍັງໄດ້ເນັ້ນໃຫ້ ກະຊວງ ຍທຂ ເອົາໃຈໃສ່ພັດທະນາ 9 ທ່າບົກ ຕາມຈຸດຕ່າງໆ ທີ່ໄດ້ກຳນົດໄວ້ ໃຫ້ເປັນຮູບປະທຳ; ຕ້ອງເພີ່ມທະວີການຕິດຕາມກວດກາການຄຸ້ມຄອງນໍາໃຊ້ພື້ນຖານໂຄງລ່າງ ເປັນປົກກະຕິ ແລະ ຕໍ່ເນື່ອງ, ສໍາຄັນຕ້ອງສ້າງໃຫ້ໄດ້ເຈົ້າໜ້າທີ່ ຜູ້ທີ່ມີຄວາມຮູ້ຄວາມສາມາດ ແລະ ມີຄວາມຮັບຜິດຊອບສູງໃນການປະຕິບັດໜ້າທີ່;

ສືບຕໍ່ປັບປຸງກົງຈັກການຈັດຕັ້ງ ຕາມທິດກະທັດຮັດ ແລະ ເຂັ້ມແຂງ, ພັດທະນາຂີດຄວາມສາມາດພະນັກງານ-ລັດຖະກອນຂອງຂະແໜງການ ຍທຂ ໃຫ້ມີຄວາມຊໍານານງານກາຍເປັນມືອາຊີບເທື່ອລະກ້າວ ຕ້ອງຫຼິກລ້ຽງແນວຄິດ ແລະ ພຶດຕິກຳ ທີ່ອັດຕະວິໄສ ຫຼື ອາລົມຈິດ ໃນການຈັດວາງພະນັກງານ ແລະ ປັບປຸງການຈັດຕັ້ງ;

ສືບຕໍ່ເອົາໃຈໃສ່ ປັບປຸງຍົກລະດັບຄວາມສາມາດ ໃນການປະຕິບັດໜ້າທີ່ການເມືອງ ຕໍ່ກັບວຽກງານແນວຄິດການເມືອງໃຫ້ແກ່ພະນັກງານຂອງຕົນສູງຂຶ້ນຢ່າງບໍ່ຢຸດຢັ້ງ; ເພີ່ມທະວີການປະຕິບັດວຽກງານຂອງຕົນຢ່າງ ມີຄວາມຮັບຜິດຊອບສູງ, ມີຈັນຍາບັນ ແລະ ມີຄວາມຊື່ສັດຕໍ່ວິຊາຊີບຂອງຕົນຢ່າງແທ້ຈິງ;

ຕ້ານ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆ ໃນຂອບເຂດຄວາມຮັບຜິດຊອບຂອງຕົນ ໃຫ້ນັບມື້ຫຼຸດໜ້ອຍຖອຍລົງ ໂດຍສະເພາະ ບັນຫາການສໍ້ລາດບັງຫຼວງ.

ຂ່າວ-ຮູບ: ກົມປະຊາສຳພັນ ຫສນຍ

ข่าวทั่วไป