ພໍ່ຕູ້ຄາດຕະກໍາເມຍຢູ່ໜອງນໍ້າຍ້ອນຫຶງຫວງ

ພໍ່ຕູ້ຄາດຕະກໍາເມຍຢູ່ໜອງນໍ້າຍ້ອນຫຶງຫວງ

ທ້າວ ແຫຼ້ ອາຍຸ 66 ປີ ພັກເຊົາຢູ່ບ້ານຜາງແຫ້ງ ເມືອງນາຊາຍທອງ ນະຄອນຫຼວງວຽງຈັນ ຄາດຕະກຳເມຍ ຊື່ນາງ ຄໍາຫວານ ຍ້ອນຄວາມຫຶງຫວງ ຖືກເຈົ້າໜ້າທີ່ຈັບຕົວມາດຳເນີນຄະດີ.

ພັທ ບຸນມີ ກັນຕິຍະວົງ ຮອງຫົວໜ້າກອງບັນຊາການ ປກສ ເມືອງນາຊາຍທອງ ໃຫ້ຮູ້ວ່າ: ວັນທີ 27 ມິຖຸນາ 2022, ໄດ້ຮັບແຈ້ງຈາກບ້ານຜາງແຫ້ງວ່າ: ໄດ້ພົບເຫັນຊາກສົບຄົນຢູ່ໜອງນໍ້າ ເຂດບ້ານຜາງແຫ້ງ ຈິ່ງໄດ້ແຕ່ງຕັ້ງກຳລັງລົງກວດກາຊັນນະສູດສະຖານທີ່ເກີດເຫດ ພົບເຫັນຊາກສົບເປັນເພດຍິງ ຊື່ນາງ ຄໍາຫວານ ອາຍຸ 55 ປີ ພັກເຊົາຢູ່ບ້ານຜາງແຫ້ງ ເມືອງນາຊາຍທອງ ເກັບກໍາຂໍ້ມູນຫຼັກຖານເບືອງຕົ້ນຮູ້ໄດ້ວ່າ ນາງ ຄຳຫວານ ຖືກຜົວລົງມືຄາດຕະກໍາ, ຮອດເວລາ 14:00 ໂມງ ຂອງວັນດຽວກັນ ເຈົ້າໜ້າທີ່ຈຶງຕິດຕາມຈັບຕົວ ທ້າວ ແຫຼ້ ຢູ່ເຂດບ້ານນາຝາຍ ເມືອງທຸລະຄົມ ແຂວງວຽງຈັນ ມາດຳເນີນຄະດີ.

ຜ່ານການສອບສວນ ທ້າວ ແຫຼ້ ສາລະພາບວ່າ: ໄດ້ລົງມືຄາດຕະກໍານາງ ຄຳຫວານ ຜູ້ເປັນເມຍ ສາເຫດເກີດມາຈາກ ການຫຶງ ຜິດຖຽງກັນຮຸນແຮງ, ມີການທົບທາງດ້ານຈິດໃຈ ຈົນບໍ່ສາມາດຢັບຢັ້ງຈິດໃຈຕົນເອງໄດ້ ໃນວັນທີ 11 ພຶດສະພາ 2022 ລົງມືຄາດຕະກໍານາງ ຄຳຫວານ ດ້ວຍວິທີໃຊ້ມືກົດຫົວເມຍລົງໜອງນໍ້າ ປະມານ 2 ນາທີ ພາໃຫ້ຂາດອາກາດຫາຍໃຈ ເປັນເຫດໃຫ້ເສຍຊີວິດ;

ຫຼັງຈາກນັ້ນ ກໍ່ກັບຂຶ້ນໄປນອນ; ຕົກມາຮອດເວລາ 6:00 ໂມງ ຂອງວັນທີ 12 ພຶດສະພາ 2022 ເຫັນຊາກສົບຟູນໍ້າຂຶ້ນມາ ຈິ່ງໄດ້ເອົາຊາກສົບໃສ່ກະສອບເປົາພ້ອມທັງເອົາດິນບ໋ອກສອງກ້ອນມັດໃສ່ສາຍເຫຼັກລວດເຕັງໄວ້,ແລ້ວໄປຍັດໃສ່ກ້ອງກະຊັງປາ ຈາກນັ້ນກໍ່ເອົາຕົວຫຼົບໜີ ໄປຢູ່ແຂວງວຽງຈັນ;

ມາຮອດວັນ 27 ມິຖຸນາ 2022 ຈິ່ງຖືກເຈົ້າໜ້າທີ່ຈັບຕົວ.ຕໍ່ກັບຄະດີດັ່ງກ່າວ ກອງບັນຊາການ ປກສ ເມືອງນາຊາຍທອງ ໄດ້ອອກຄຳສັ່ງເປີດການສືບສວນ ສອບສວນ ສະຫຼຸບສໍານວນຄະດີສົ່ງໄອຍະການ ປະຊາຊົນ ດໍາເນີນຄະດີຕາມກົດໝາຍ.

ຂ່າວໂດຍ: ປ້ອງກັນຄວາມສະຫງົບ ນະຄອນຫຼວງວຽງຈັນ

ຂ່າວ:ຮທ ລັດຕະນະ.

ข่าวทั่วไป