ເງິນລົງທຶນຈາກຕ່າງປະເທດເຂົ້າ ຫວຽດນາມ ບັນລຸຫຼາຍກວ່າ 14 ຕື້ໂດລາ

ເງິນລົງທຶນຈາກຕ່າງປະເທດເຂົ້າ ຫວຽດນາມ ບັນລຸຫຼາຍກວ່າ 14 ຕື້ໂດລາ

ວິທະຍຸກະຈາຍສຽງຫວຽດນາມລາຍງານວ່າ: ກົມການລົງທຶນຕ່າງປະເທດ, ກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ: ໄລ່ມາຮອດວັນທີ 20 ມິຖຸນາ 2022, ເງິນລົງທຶນໂດຍກົງຈາກຕ່າງປະເທດ (FDI)ທີ່ ຈົດທະບຽບສະໜອງໃໝ່, ປັບປຸງ ແລະ ປະກອບທຶນຊື້ຫຸ້ນສ່ວນຂອງນັກລົງທຶນຕ່າງປະເທດ ແມ່ນບັນລຸຫຼາຍກວ່າ 14 ຕື້ໂດລາ.

ເງິນລົງທຶນຈາກຕ່າງປະເທດ ທີ່ປະຕິບັດບັນດາໂຄງ ການລົງທຶນຕ່າງປະເທດ ໃນ 6 ເດືອນຕົ້ນປີ 2022 ເພີ່ມຂຶ້ນ 8,9% ເມື່ອທຽບໃສ່ໄລຍະດຽວກັນຂອງປີ 2021. ສິ່ງດັ່ງກ່າວໄດ້ສະແດງໃຫ້ເຫັນວ່າ ບັນດາວິສາຫະກິດພວມຟື້ນຟູຢ່າງບໍ່ຢຸດຢັ້ງ, ຮັກສາ ແລະ ເປີດກວ້າງການເຄື່ອນໄຫວຜະລິດດຳເນີນທຸລະກິດ.


ຂ່າວລະບຸວ່າ: ບັນດານັກລົງທຶນຕ່າງປະເທດໄດ້ລົງທຶນເຂົ້າໃນ 18 ຂະແໜງການ ໃນຈຳນວນ 21 ຂະແໜງການເສດຖະກິດຂອງ ຫວຽດນາມ. ໃນນັ້ນ, ຂະແໜງອຸດສາຫະກຳປຸງແຕ່ງ, ປະດິດສ້າງ ສືບຕໍ່ຢືນອັນດັບທີ 1; ອັນດັບທີ 2 ແມ່ນຂະແໜງດຳເນີນທຸລະກິດອະສັງຫາລິມະສັບ. ຄູ່ຮ່ວມມືລົງທຶນ, ມີ 84 ປະເທດ ແລະ ເຂດແຄວ້ນ ໄດ້ເຂົ້າມາລົງທຶນຢູ່ ຫວຽດນາມ ໃນ 6 ເດືອນຕົ້ນປີ 2022.

ໃນນັ້ນ, ສິງກະໂປ ນຳໜ້າດ້ວຍເງິນລົງທຶນທັງໝົດຫຼາຍກວ່າ 4,1 ຕື້ໂດລາ; ອັນດັບທີ 2 ແມ່ນ ສ.ເກົາຫຼີ, ອັນດັບທີ 3 ແມ່ນ ແດນມາກ; ຖັດຈາກນັ້ນແມ່ນ ຈີນ, ຍີ່ປຸ່ນ, ຮົງກົງ (ຈີນ).

ข่าวทั่วไป