ຢ້ອນຄະດີ ເຈົ້າໜ້າທີ່ ປິດຄະດີລັກຕັດສາຍໄຟຟ້າ ສ້າງຜົນເສຍຫາຍ 34 ລ້ານກວ່າກີບ

ຢ້ອນຄະດີ ເຈົ້າໜ້າທີ່ ປິດຄະດີລັກຕັດສາຍໄຟຟ້າ ສ້າງຜົນເສຍຫາຍ 34 ລ້ານກວ່າກີບ

ພາຍຫຼັງເຈົ້າໜ້າທີ່ໜ່ວຍງານວິຊາສະເພາະຄະດີອາຍາ ປກສ ເມືອງວຽງຄໍາ ແຂວງວຽງຈັນ ໄດ້ຮັບຂໍ້ມູນຂ່າວຈາກພົນລະເມືອງດີວ່າ: ຢູ່ຂອບເຂດເມືອງວຽງຄໍາ ແຂວງວຽງຈັນ ໄດ້ມີຄົນບໍ່ດີເຄື່ອນໄຫວລັກຊັບພົນລະເມືອງ. ສະນັ້ນ, ເຈົ້າໜ້າທີ່ໜ່ວຍງານວິຊາສະເພາະຄະດີອາຍາ ກອງບັນຊາການ ປກສ ເມືອງວຽງຄໍາ

ຈຶ່ງເລັ່ງຕິດຕາມເປົ້າໝາຍເຄື່ອນໄຫວລັກຊັບພົມລະເມືອງຈຶ່ງສາມາດກັກຕົວເປົ້າໝາຍໄດ້ 1 ຄົນ ຄື: ທ້າວ ສາຍສະໝອນ ອາຍຸ 22 ປີ ປະຊາຊົນຢູ່ບ້ານໂພນໝີ ເໜືອ ເມືອງວຽງຄໍາ ແຂວງວຽງຈັນ ກັກຕົວຄັ້ງວັນທີ 27 ມັງກອນ 2022 ໃນຂໍ້ກ່າວຫາລັກຊັບພົນລະເມືອງ ມາທຳການສຶບສວນ-ສອບສວນ.

ຜ່ານການສືບສວນ-ສອບສອນຂອງເຈົ້າໜ້າທີ່, ທ້າວ ສາຍສະໝອນ ຮັບສາລະພາບວ່າ: ໃນໄລຍະຜ່ານມາ, ຜູ້ກ່ຽວແມ່ນໄດ້ເຄື່ອນໄຫວຊອກລັກຕັດໄຟຟ້າ ເປັນຈຳນວນ 8 ຄັ້ງ. ໃນລະຫວ່າງເດືອນມີຖຸນາ 2021, ຜູ້ກ່ຽວແມ່ນໄດ້ເຄື່ອນໄຫວລັກຊັບ 2 ຄັ້ງ ຄັ້ງທີ 1: ແມ່ນໄປລັກຕັດສາຍໄຟຟ້າຢູ່ໂຮງຮຽນອານຸບານ ບ້ານໂພນໝີ.

ພາຍຫຼັງໄດ້ສາຍໄຟແລ້ວຜູ້ກ່ຽວກໍເອົາໄປຂາຍໄດ້ເງິນຈໍານວນ 30.000 ກີບ, ຄັ້ງທີ 2: ໄປລັກຕັດສາຍໄຟຟ້າຢູ່ຫ້ອງການສູນວັດທະນະທຳແຂວງວຽງຈັນ ໃນຂະນະທີ່ຜູ້ກ່ຽວກໍາລັງດຶງສາຍໄຟຟ້າ ພໍດີມີພະນັກງານຫ້ອງການດັ່ງກ່າວໄດ້ພົບເຫັນ ຜູ້ກ່ຽວເຫັນທ່າບໍ່ດີໄດ້ແລ່ນອອກໄປ ແຕ່ບໍ່ໄດ້ເຄື່ອງ; ໃນລະຫວ່າງເດືອນສິງຫາ 2021, ໄດ້ເຄື່ອນໄຫວຊອກລັກ 2 ຄັ້ງ

ຄັ້ງທີ່ 1: ແມ່ນໄປລັກຕັດສາຍໄຟຟ້າຢູ່ຮ້ານສະນຸກເກີ້ ບ້ານນາທອງ ໄດ້ສາຍ ໄຟຟ້າຈໍານວນ 500 ກະລາມ ແລ້ວເອົາໄປຂາຍໄດ້ເງິນຈໍານວນ 35.000 ກີບ, ຄັ້ງທີ່ 2: ຜູ້ກ່ຽວໄປລັກຕັດເອົາສາຍໄຟຟ້າຢູ່ວັດບ້ານດອນແກ້ວ ເມືອງໂພນໂຮງ ຫຼັງຈາກໄດ້ສາຍໄຟແລ້ວກໍ່ເອົາໄປຂາຍໄດ້ເງີນຈໍານວນ 40.000 ກີບ;

ໃນລະຫວ່າງເດືອນມັງກອນ 2022, ຜູ້ກ່ຽວໄດ້ເຄື່ອນໄຫວລັກຊັບຈຳນວນ 4 ຄັ້ງ ຄື:

ຄັ້ງທີ 1: ໄປລັກຕັດສາຍໄຟຟ້າຢູ່ເຮືອນປະຊາຊົນບ້ານໂພນໝີໃຕ້. ຈາກນັ້ນ, ເອົາໄປປ໋ອກແລ້ວຂາຍໄດ້ເງິນ 50.000 ກີບ,

ຄັ້ງທີ 2: ແມ່ນໄປລັກຕັດສາຍໄຟຟ້າຢູ່ສູນປ່ອຍສັນຍານ ຢູນີແທວ ບ້ານໂພນໝີໃຕ້ ໄດ້ໝໍ້ໄຟ 1 ໝ່ວຍ ແລະ ສາຍໄຟຟ້າຈໍານວນໜຶ່ງ, ຫຼັງຈາກນັ້ນ, ເອົາໄປຂາຍໄດ້ເງິນຈຳນວນ 200.000 ກີບ,

ຄັ້ງທີ 3: ແມ່ນໄປລັກຕັດເອົາປະຕູຮົ້ວຢູ່ສວນຂອງປະຊາຊົນ ແລ້ວເອົາໄປຂາຍໄດ້ເງິນຈໍານວນ 50.000 ກີບ,

ຄັ້ງທີ 4: ແມ່ນໄປເຄື່ອນໄຫວລັກຕັດສາຍໄຟຟ້າຢູ່ຈຸດປ່ອຍສັນຍານຂອງລາວໂທລະຄົມ ຢູ່ບ້ານທ່າລາດ ເມືອງແກ້ວອຸດົມ ໄດ້ປີນຂື້ນຕາມຕາໜ່າງ ເອົາຄີມມາຕັດສາຍໄຟແຕ່ບັງເອີນແຂນຂອງຜູ້ກ່ຽວໄປແປະກັບສາຍໄຟຟ້າເຮັດໃຫ້ ໄຟຟ້າແຕກຊ໋ອດໃສ່ຜູ້ກ່ຽວ ຜູ້ກ່ຽວກໍໄດ້ລົ້ມລົງບໍ່ຮູ້ສຶກຕົວ ເມື່ອຜູ້ກ່ຽວຮູ້ສຶກຕົວແລ້ວ ຈຶ່ງຍ່າງມາຫາລົດ ແລ້ວຂີ່ລົດຈັກກັບເຮືອນ ໂດຍບໍ່ໄດ້ຫຍັງ ສ່ວນເງິນທີ່ໄດ້ຈາກການຂາຍແຕ່ລະຄັ້ງ ຜູ້ກ່ຽວແມ່ນໄດ້ເອົາໄປໃຊ້ຈ່າຍຫຼິ້ນກິນຟູມເຟືອຍຈົນໜົດ.

ແຕ່ຍ້ອນຄວາມເອົາໃຈໃສ່ຂອງເຈົ້າໜ້າທີ່ວິຊາສະເພາະປກສ ເມືອງວຽງຄໍາ ໃນການຕິດຕາມເປົ້້າໜາຍດັ່ງກ່າວ ໃນທີ່ສຸດ ກໍສາມາດຈັບຕົວ ທ້າວ ສາຍສະໝອນ ໄດ້ ໃນຄັ້ງວັນທີ 27 ມັງກອນ 2022 ມາດຳເນີນຄະດີຕາມລະບຽບກົດໜາຍ.

ข่าวทั่วไป