ກະຊວງການເງິນ ຊີ້ແຈງຄວາມຄືບໜ້າທິດທາງການປະຕິຮູບລັດວິສາຫະກິດ

ກະຊວງການເງິນ ຊີ້ແຈງຄວາມຄືບໜ້າທິດທາງການປະຕິຮູບລັດວິສາຫະກິດ

ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ ໄດ້ຊີ້ແຈງຕໍ່ບົດລາຍງານຂອງລັດຖະບານກ່ຽວກັບຄວາມຄືບໜ້າທິດທາງໃນການປະຕິຮູບລັດວິສາຫະກິດ ຕໍ່ຄຳຊັກຖາມຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ IX ໃນວັນທີ 22 ມິຖຸນາ ຜ່ານມາ, ໂດຍການເປັນປະທານຂອງ ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.

ທ່ານລັດຖະມົນຕີກະຊວງການເງິນ ໄດ້ຊີ້ແຈງວ່າ: ສຳລັບຍຸດທະສາດລວມເຫັນວ່າຍັງຈະຕ້ອງລົງເລິກລະອຽດຕື່ມ ຊຶ່ງວິສາຫະກິດເປັນຍຸດທະສາດໜຶ່ງ ແມ່ນຍຸດທະສາດໃນວຽກງານປ້ອງກັນຊາດ-ປ້ອງກັນຄວາມສະ ຫງົບ, ຍຸດທະສາດທາງດ້ານການເມືອງ, ຍຸດທະສາດທາງດ້ານສັງຄົມ, ອີງໃສ່ບົດສະເໜີຂອງບໍລິສັດທີ່ປຶກສາທີ່ຈະວ່າຈ້າງມາເຊັ່ນ:

5 ວິສາຫະກິດໃຫຍ່ທີ່ມີຄວາມຈຳເປັນ ຄະນະປະຕິຮູບຕ້ອງໄດ້ມີການວ່າຈ້າງບໍລິສັດທີ່ປຶກສາທີ່ມີຊື່ສຽງເພື່ອມາປະເມີນກວດກາຄືນເບິ່ງຕົວຈິງທັງໝົດ ແລະ ໃຫ້ບໍລິສັດສະເໜີແນະວ່າວິສາຫະກິດດັ່ງກ່າວຄວນປັບໂຄງສ້າງແນວໃດ?, ຄວນບໍລິຫານແນວໃດ? ຕ້ອງໄດ້ເອົາມືອາຊີບມາປະເມີນໃຫ້ເພື່ອໃຫ້ມັນໄປຖືກຈຸດ. ໃນເວລານັ້ນຈຶ່ງມາຄົ້ນຄວ້າວ່າວິສາຫະກິດຄວນປັບແນວໃດ, ໂຄງສ້າງແນວໃດ?.

ທ່ານ ບຸນໂຈມ ອຸບົນປະເສີດ ໄດ້ຢືນຢັນວ່າ: ຈະນໍາເອົາທຸກຄວາມຄິດເຫັນເພື່ອນໍາໄປປັບປຸງນະໂຍບາຍ, ຍຸດທະສາດຕື່ມ ຊຶ່ງໃນວັນທີ 1 ກໍລະກົດທີ່ຈະມາເຖິງນີ້ຈະໄດ້ຜ່ານກົດໝາຍວ່າດ້ວຍຊັບສິນແຫ່ງລັດ. ໃນນີ້ຈະໄດ້ປັບປຸງມາດຕາ 14 ຊຶ່ງຜ່ານມາເຫັນວ່າຍັງບໍ່ຈະແຈ້ງ ຊຶ່ງວິສາຫະກິດທີ່ເປັນຍຸດທະສາດ ເປັນວົງຄະນາຍາດກ່ອນຈະປະຕິຮູບຕ້ອງໄດ້ນໍາສະເໜີຕໍ່ກອງປະຊຸມສະພາແຫ່ງຊາດເພື່ອມີຄຳເຫັນພິຈາລະນາເຮົາຈະໃຫ້ມັນແຈ່ງໃນການປັບປຸງກົດໝາຍຊຸດນີ້.

ສ່ວນວ່າການດຳເນີນການຕີລາຄາຊັບສິນຂອງລັດໄດ້ມີການຄົ້ນຄວ້າ ໃນປັດຈຸບັນທາງກະຊວງການເງິນໄດ້ສົມທົບກັບບໍລິສັດທີ່ປຶກສາຈຳນວນໜຶ່ງເພື່ອມາປະເມີນຊັບສິນກ່ອນຈະຍຸບ ຈະບໍ່ໃຫ້ພະນັກງານລັດໄປເຮັດໂດຍລຳພັງ ພວກເຮົາມີບໍລິສັດທີ່ປຶກສາເປັນຜູ້ປະເມີນໃຫ້, ຫຼັງຈາກນັ້ນຄະນະກໍາມະການຈຶ່ງມາຄົ້ນຄວ້າເພື່ອຄວາມໂປ່ງໃສ, ຖືກຕ້ອງຕາມຫຼັກການ.

ສຳລັບວິສາຫະກິດທີ່ໄດ້ກຳນົດໄວ້ທີ່ຈະຮັກສາຮຸ້ນ 100% ຫຼື ຈະໃຫ້ລັດຖືຮຸ້ນຫຼາຍກວ່າ ໃນ 20 ບໍລິສັດໄດ້ມີບັນຊີໝົດແລ້ວ ຊຶ່ງພວກເຮົາຈະຮັກສາໄວ້ມີບໍລິສັດຜະລິດໄຟຟ້າລາວ, ບໍລິສັດໄຟຟ້າລາວມະຫາຊົນ, ລັດວິສາຫະກິດການບິນລາວ, ນໍ້າມັນເຊື້ອໄຟລາວ, ໂຮງງານຜະລິດຢາເລກ 2, ເລກ 3, ລັດວິສາຫະກິດດາວທຽມລາວ ແລະ ບໍລິສັດອື່ນໆ ຊຶ່ງຈະຮັກສາເປັນວິສາຫະກິດ 100% ພາຍຫຼັງທີ່ປະເມີນລະອຽດຈະມີການຄົ້ນຄວ້າຕື່ມ.

ຫຼາຍທ່ານໄດ້ຕັ້ງບັນຫາວ່າ: ຜ່ານມາໄດ້ນໍາໃຊ້ລັດວິສາຫະກິດນໍ້າມັນເຊື້ອໄຟລາວເຮັດການສະສົມແນວໃດ ກະຊວງການເງິນເຄີຍໄດ້ຕັ້ງກົມສະສົມແຫ່ງລັດຂຶ້ນ ອີງໃສ່ບົດຮຽນຂອງປະເທດເພື່ອບ້ານເພື່ອສະສົມເຂົ້າກັບນໍ້າມັນກໍໄດ້ມີການສ້າງສາງ, ສ້າງລະບົບ ໄລຍະໜຶ່ງກໍມີນໍ້າມັນສະສົມໃຊ້ກຸ້ມໄດ້ຫຼາຍເດືອນ ແຕ່ມາໄລຍະຫຼັງການສະສົມດັ່ງກ່າວຄ່ອຍຫາຍໄປ.

ປັດຈຸບັນພວກເຮົາຈຶ່ງໄດ້ມາຄົ້ນຄວ້າສ້າງຕັ້ງບໍລິສັດນໍ້າມັນເຊື້ອໄຟແຫ່ງຊາດຂຶ້ນຕາມການຕົກລົງຂອງລັດຖະບານເບື້ອງຕົ້ນ ໃນການສ້າງຕັ້ງນັ້ນທາງລັດຖະບານຈະເປັນຜູ້ຄົ້ນຄວ້າວ່າບໍລິສັດນໍ້າມັນເຊື້ອໄຟແຫ່ງຊາດນີ້ຈະມີພາລະບົດບາດແນວໃດ ?

ສ່ວນວ່າລັດວິສາຫະກິດນໍ້າມັນເຊື້ອໄຟລາວໃນປັດຈຸບັນ ຄວນໃຫ້ເປັນທຸລະກິດແນວໃດ ຍັງຈະໄດ້ສືບຕໍ່ຄົ້ນຄວ້າຕື່ມ, ຕາມຫຼັກແທ້ລັດວິສາຫະກິດນໍ້າມັນເຊື້ອໄຟລາວໃນປັດຈຸບັນຈະຕ້ອງມີນໍ້າມັນສະສົມໄວ້ຢ່າງຕໍ່າກຸ້ມ 3 ເດືອນ, ປໍ້າເອກະຊົນປິດ ແຕ່ວ່າປໍ້ານໍ້າມັນເຊື້ອໄຟລາວຕ້ອງເປີດມັນມີຍຸດທະສາດແລ້ວ ພວກເຮົາຕ້ອງໄດ້ສືບຕໍ່ປັບປຸງປະຕິຮູບດັ່ງກ່າວ.

ຂ່າວ: ພູວັນ

ข่าวทั่วไป