ສ້າງຄຸກເພີ່ມຢູ່ ເຂດເສດຖະກິດພິເສດສາມຫຼ່ຽມຄຳ

ສ້າງຄຸກເພີ່ມຢູ່ ເຂດເສດຖະກິດພິເສດສາມຫຼ່ຽມຄຳ

ໃນວັນທີ 16 ມິຖຸນາ 2022 ໄດ້ມີພິທີມອບ-ຮັບຄ້າຍຄຸມຂັງ, ດັດສ້າງ ເຂດເສດຖະກິດພິເສດສາມຫຼ່ຽມຄຳ ໃຫ້ແກ່ກອງບັນຊາການປ້ອງກັນຄວາມສະຫງົບ ແຂວງບໍ່ແກ້ວ

ໂດຍການລົງນາມລາຍເຊັ່ນມອບ-ຮັບ ກັນ ລະຫວ່າງ ທ່ານ ນາງ ຈຳປາ ຮອງສະພາບໍລິຫານເຂດເສດຖະກິດພິເສດສາມຫຼ່ຽມຄຳ ກັບ ທ່ານ ພັນເອກ ຈັນພອນເພັດ ຄຳສີ ຮອງຫົວໜ້າ ກອງບັນຊາການປ້ອງກັນຄວາມສະຫງົບ ແຂວງບໍ່ແກ້ວ ໃຫ້ກຽດເຂົ້າຮ່ວມໂດຍ ທ່ານ ເຄືອນເພັດ ວົງຈັນ ຮອງເຈົ້າແຂວງໆບໍ່ແກ້ວ, ພ້ອມມີຄະນະຄຸ້ມຄອງເຂດເສດຖະກິດພິເສດ ແຂວງບໍ່ແກ້ວ ແລະ ພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.


ໂຄງການກໍ່ສ້າງ ຄ້າຍຄຸມຂັງ-ດັດສ້າງ ເຂດເສດຖະກິດພິເສດສາມຫຼ່ຽມຄໍາ ໄດ້ເລີ່ມລົງມືກໍ່ສ້າງມາແຕ່ ເດືອນ 10 ປີ 2021 ໃຊ້ເວລາການກໍ່ສ້າງ 08 ເດືອນສຳເລັດ, ສ້າງຂື້ນເຂດບ້ານມ່ວງຄຳ ເມືອງຕົ້ນເຜິ້ງ ແຂວງ ບໍ່ແກ້ວ ຫ່າງຈາກ ເຂດເສດຖະກິດພິເສດສາມຫຼ່ຽມຄຳ ປະມານເກືອບ 3 ກິໂລແມັດ, ມີເນື້ອທີ່ທັງຫມົດ 900 ກວ່າ ຕາແມັດ, ເປັນອາຄານຊັ້ນດຽວ, ປະກອບມີ: 05 ຫລັງ, ລວມ 30 ຫ້ອງ, ໃນນີ້ມີຫ້ອງຂັງຜູ້ກະທໍາຜິດ 24 ຫ້ອງ; ຫ້ອງເຮັດວຽກເຈົ້າຫນ້າທີ່ 06 ຫ້ອງ ລວມມູນຄ່າການກໍ່ສ້າງ 11 ຕື້ 368 ລ້ານກວ່າກີບ ໂດຍແມ່ນ ລົງທຶນຂອງຝ່າຍຜູ້ພັດທະນາ ກໍ່ຄື: ກຸ່ມບໍລິສັດ ດອກງິ້ວຄໍາ ຈໍາກັດ 100% .


ເພື່ອປະກອບສ່ວນເຂົ້າໃນວຽກງານປ້ອງກັນຄວາມສະຫງົບ ແລະ ການຕ້ານ,ສະກັດກັ້ນປະກົດການຫຍໍ້ທໍ້ໃນສັງຄົມໃຫ້ຫຼຸດໜ້ອຍຖ່ອຍລົງເທື່ອລະກ້າວ,ໂດຍສະເພາະແມ່ນພາຍເຂດເສດຖະກິດພິເສດສາມຫຼ່ຽມຄໍາ ກໍ່ຄືແຂວງບໍ່ແກ້ວ ໄດ້ສືບຕໍ່ມີຄວາມສະຫງົບ, ມີຄວາມເປັນລະບຽບຮຽບຮ້ອຍ, ທຸກຄົນໄດ້ດຳລົງຊີວິດທຳມາຫາກິນດ້ວຍປອດໄພ, ພ້ອມກັນປະກອບສ່ວນເຂົ້າໃນການສ້າງສາພັດທະນາແຂວງບໍ່ແກ້ວໃຫ້ເຕີບໃຫຍ່ຂະຫຍາຍຕົວຂື້ນເລື້ອຍໆ.


ຂ່າວ: ສາຍສະໝອນ ແກ້ວວິສິດ
ພາບ: ຫ້ອງການໂຄສະນາເຜີ່ຍແຜ່ຂໍ້ມູນຂ່າວສານ ສະພາບໍລິຫານ ເຂດເສດຖະກິດພິເສດ ສາມຫຼ່ຽມຄຳ

ข่าวทั่วไป