ປໍ້ານໍ້າມັນຫລາຍແຫ່ງ ໃນ ນວ ເລີ່ມເປີດໃຫ້ບໍລິການປົກກະຕິ

ປໍ້ານໍ້າມັນຫລາຍແຫ່ງ ໃນ ນວ ເລີ່ມເປີດໃຫ້ບໍລິການປົກກະຕິ

ຂປລ. ອີງຕາມຂໍ້ມູນຈາກ ລັດວິສາຫະກິດນໍ້າມັນເຊື້ອໄຟລາວ (ລນລ) ໃຫ້ຮູ້ວ່າ: ລນລ ສະເພາະຈຸດນະຄອນຫລວງວຽງຈັນ ຕາມການສັ່ງຈ່າຍນໍ້າມັນຕົວຈິງ ສູ່ປໍ້າຕົວແທນໃນຂົງເຂດເມືອງຕ່າງໆ ໃນຕອນເຊົ້າຂອງວັນທີ 20 ມິຖຸນາ 2022 ນີ້, ມີທັງໝົດ 35 ປໍ້າ ປາກົດວ່າປໍ້າສ່ວນຫລາຍແມ່ນໄດ້ຈຳໜ່າຍໝົດກ່ອນເວລາເຊິ່ງທາງ ລນລ ຈະໄດ້ເລັ່ງຂົນສົ່ງໃຫ້ຄົບຕາມຈຳນວນທີ່ແຈ້ງໄປໂດຍເລັ່ງດ່ວນ ແລະ ສະເພາະ 3 ປໍ້າຕົວແບບຂອງ ລນລ ມີ ປໍ້າສີວິໄລ ຫລັກ 7, ປໍ້າໂພນສະອາດ ແລະປໍ້າແສງສະຫວ່າງ ດົງຈອງ

ເຊິ່ງໄດ້ເປີດໃຫ້ບໍລິການເປັນປົກກະຕິ ຕັ້ງແຕ່ເວລາ 06:30-18:30 (ອາດຈະຂຶ້ນກັບປະລິມານນໍ້າມັນ ແລະ ຈຳນວນລູກຄ້າໃນແຕ່ລະວັນ) ຫລື ສາມາດກວດເບິ່ງຕົວຈິງຕາມລິ້ງ https://gas.mts.la ລັດວິສາຫະກິດນໍ້າມັນເຊື້ອໄຟລາວ ໃຫ້ຮູ້ວ່າ: ໃນວັນທີ 19 ມິຖຸນາ 2022 ເວລາ 08:30 ໂມງ ຜ່ານມາສາງນໍ້າມັນດົງຈອງຈຸດນະຄອນຫລວງ ຂອງ ລນລ ຮັບນໍ້າມັນຜ່ານແດນ ແອັດຊັງ 348.800 ລິດ, ກະຊວນ 255.000 ລິດ ເພື່ອກະກຽມກະຈາຍສູ່ສັງຄົມ ແລະ ຕໍ່ມາການຂົນສົ່ງກໍໄດ້ກະຈາຍນໍ້າມັນສູ່ປໍ້າຕົວແທນເປັນສ່ວນໃຫຍ່ແລ້ວລວມທັ້ງປໍ້າຕົວແທນທີ່ຢູ່ຕ່າງແຂວງ

ເພື່ອກຽມຄວາມພ້ອມຈຳໜ່າຍໃນວັນທີ 20 ມິຖຸນາ ນີ້ໃຫ້ທັນກຳໜົດຕາມແຈ້ງການເຊິ່ງກໍໄດ້ມີປໍ້ານໍ້າມັນຫລາຍແຫ່ງໃນນະຄອນຫລວງວຽງຈັນ ເລີ່ມເປີດໃຫ້ບໍລິການປົກກະຕິທ່າມກາງເຈົ້າຂອງພາຫະນະຫລັ່ງໄຫລໄປໃຊ້ບໍລິການ. ຂະນະທີ່ບາງປໍ້າແຈ້ງຕໍ່ລູກຄ້າເປີດໃຫ້ບໍລິການບໍ່ທ່ວງທັນໃນມື້ນີ້ຕາມທີ່ຄະນະລັດຖະບານໄດ້ແຈ້ງ ແລະຄາດວ່າຈະເປີດໃຫ້ບໍລິການເປັນປົກກະຕິພາຍໃນອາທິດນີ້ແນ່ນອນ.


ອີງຕາມແຈ້ງການຂອງ ລັດຖະມົນຕີກະຊວງການເງິນ ເລກທີ 1768/ກງ, ນະຄອນ ຫລວງວຽງຈັນ ລົງວັນທີ 17 ມິຖຸນາ 2022 ແລະ ອີງຕາມນະໂຍບາຍຂອງລັດຖະບານໃນການແກ້ໄຂ ສະພາບການຂາດແຄນຂອງນໍ້າມັນເຊື້ອໄຟ ແລະເພື່ອຈັດຕັ້ງປະຕິບັດການນຳເຂົ້າ ແລະ ການສະໜອງນໍ້າມັນເຊື້ອໄຟ ໃຫ້ທົ່ວເຖິງໃນຂອບເຂດທົ່ວປະເທດຕາມນະໂຍ ບາຍຂອງລັດຖະບານ ໃຫ້ມີຄວາມສະດວກ ແລະວ່ອງໄວ, ທັນສະພາບການ, ຮັບປະກັນການຕອບສະໜອງຕາມແຜນການນຳເຂົ້າຂອງບັນດາບໍລິສັດນໍ້າມັນເຊື້ອໄຟ ທີ່ໄດ້ຮັບອະນຸຍາດຈາກລັດທະບານ.

ພ້ອມກັນນີ້, ກໍໄດ້ມອບໝາຍໃຫ້ຫົວໜ້າກົມສ່ວຍສາອາກອນຊີ້ນຳຫົວໜ້າສ່ວຍສາອາກອນປະຈຳແຂວງ, ນະຄອນຫລວງ ເພື່ອສົມທົບກັບເຈົ້າໜ້າທີ່ອຸດສາຫະກຳ ແລະ ການຄ້າ ດຳເນີນການຄຸ້ມຄອງ ແລະອຳນວຍຄວາມສະດວກໃນການເຄື່ອນຍ້າຍ ແລະເອົານໍ້າມັນເຊື້ອໄຟລົງປໍ້າເພື່ອຈຳໜ່າຍ, ພ້ອມທັງຕິດຕາມ, ກວດກາ ແລະມີມາດຕະການແກ້ໄຂການສວຍໂອກາດຂຶ້ນລາຄາເກີນໂຄງສ້າງລາຄາທີ່ລັດຖະບານໄດ້ກຳນົດ,ການກັກຕຸນນໍ້າມັນເຊື້ອໄຟ, ຖ້າພົບເຫັນໃຫ້ດຳເນີນຕາມຂັ້ນຕອນຂອງກົດໝາຍຢ່າງເດັດຂາດ.

ນອກຈາກນີ້, ມອບໃຫ້ຫົວໜ້າກົມພາສີ ຊີ້ນຳພະແນກສືບສວນ-ສອບສວນ ແລະປາບປາມການລັກລອບໜີ້ພາສີ ເພື່ອເຮັດໜ້າທີ່ໃນການສະກັດກັ້ນການລັກລອບຫລົບຫລີກພາສີຢູ່ຕາມດ່ານ ແລະ ບໍລິເວນຊາຍແດນເພື່ອບໍ່ໃຫ້ມີການລັກລອບນຳເຂົ້ານໍ້າມັນເຊື້ອໄຟທີ່ຜິດກົດໝາຍຢ່າງເດັດຂາດຖ້າພົບເຫັນໃຫ້ດຳເນີນຕາມຂັ້ນຕອນຂອງກົດໝາຍຢ່າງເຂັມງວດ.

ຂະນະດຽວກັນ, ປໍ້ານໍ້າມັນພລັສ ແລະປໍ້າເຂືອຄ່າຍພັນທະມິດຕາມແຈ້ງການຂອງລັດເປີດໃຫ້ບໍລິການທັງໝົດທຸກປໍ້າເຊົ້າມື້ນີ້ເຊິ່ງທາງປໍ້າບໍ່ຮັບຊຳລະຜ່ານແອັບທະນາຄານໃດໆ ເພື່ອຄວາມສະດວກ ແລະວ່ອງໄວລົບກວນທ່ານຜູ້ມາໃສ່ນໍ້າມັນກຽມເງິນສົດໃຫ້ພຽງພໍກັບການຊື້ນໍ້າມັນລູກຄ້າ. ສ່ວນກໍລະນີລູກຄ້າຊໍາລະດ້ວຍບັດ PlusCard ແທນເງິນສົດແມ່ນໃຊ້ໄດ້ປົກກະຕິ.

ข่าวทั่วไป