ເປີດການນໍາໃຊ້ຂົວຂ້າມນໍ້າລາຍ ບ້ານວັງທຸ່ມ

ເປີດການນໍາໃຊ້ຂົວຂ້າມນໍ້າລາຍ ບ້ານວັງທຸ່ມ

ໂຄງການກໍ່ສ້າງຂົວຂ້າມນໍ້າລາຍ ເຂດບ້ານວັງທຸ່ມ ເມືອງປາກລາຍ ແຂວງໄຊຍະບູລີ ມາຮອດປັດຈຸບັນ ສໍາເລັດ 100%, ທ່ານ ແຫຼງ ດວງປັນຍາ ນາຍບ້ານໆວັງທຸ່ມ ໃຫ້ຮູ້ວ່າ: ໂຄງການດັ່ງກ່າວແມ່ນໄດ້ເລີ່ມລົງມືຈັດຕັ້ງປະຕິບັດມາແຕ່ເດືອນມັງກອນ 2015 ກໍານົດ 3 ເດືອນຈຶ່ງສໍາເລັດ.

ຂົວມີຄວາມຍາວ 52 ແມັດ, ກວ້າງ 3 ເມັດ, ລວງສູງ 4,2 ແມັດ ເປັນຂົວໄມ້, ເສົາເບຕົງເສີມເຫຼັກ ລວມມູນຄ່າການກໍ່ສ້າງ 370 ລ້ານກີບ ດ້ວຍທຶນຂອງປະຊາຊົນພາຍໃນບ້ານແຕ່ອາຍຸການນໍາໃຊ້ໄດ້ພຽງແຕ່ 7 ປີ ຂົວຈຶ່ງມີການເປ່ເພນໍາໃຊ້ບໍ່ໄດ້.

ດັ່ງນັ້ນ, ທາງອົງການການປົກຄອງບ້ານວັງທຸ່ມ ຈຶ່ງໄດ້ລະດົມທຶນນໍາປະຊາຊົນພາຍໃນບ້ານ ແລະ ນັກທຸລະກິດຜູ້ປະກອບການ ໂດຍສົມທົບກັບຫ້ອງການໂຍທາທິການ ແລະ ຂົນສົ່ງເມືອງເພື່ອເປັນວິຊາການໃນການປັບປຸງຂົວດັ່ງກ່າວຄືນໃໝ່ປ່ຽນຈາກຂົວໄມ້ມາເປັນຂົວເຫຼັກ ຊຶ່ງໄດ້ເລີ່ມລົງມືກໍ່ສ້າງມາແຕ່ວັນທີ 1 ເມສາ 2022 ແລະ ສໍາເລັດໃນເດືອນມິຖຸນາ 2022 ລວມມູນຄ່າທັງໝົດ 534 ລ້ານກີບ.

ດັ່ງນັ້ນໃນວັນທີ 7 ມິຖຸນາ ຜ່ານມາ ຈຶ່ງໄດ້ຈັດພິທີເປີດການນໍາໃຊ້ຂົວຢ່າງເປັນທາງການ ຊຶ່ງມີທ່ານ ກອງສີ ວົງສີ ເຈົ້າເມືອງປາກລາຍ, ມີຄະນະປະຈໍາພັກເມືອງ, ຫົວໜ້າ-ຮອງຫົວໜ້າຫ້ອງການ, ນັກທຸລະກິດ, ຜູ້ປະ ກອບການ, ນາຍບ້ານ ແລະ ປະຊາຊົນພາຍໃນບ້ານເຂົ້າຮ່ວມ, ໃນໂອກາດນີ້, ທ່ານເຈົ້າເມືອງປາກລາຍ ໄດ້ໃຫ້ກຽດຕັດແຖບຜ້າ, ລັ່ນຄ້ອງ 9 ບາດເພື່ອເປັນສິລິມຸງຄຸນໃນການເປີດນໍາໃຊ້ຂົວດັ່ງກ່າວ.

ຂ່າວ-ພາບ: ກ່າ ຄຸດທະວົງສັກ

ข่าวทั่วไป