ລັດຖະບານລາວ ຈະເພີ່ມອັດຕາຖືຮຸ້ນ 20% ຂຶ້ນເປັນ 60% ໃນບໍລິສັດ ທ່າເຮືອສາກົນ ລາວ-ຫວຽດນາມ

ລັດຖະບານລາວ ຈະເພີ່ມອັດຕາຖືຮຸ້ນ 20% ຂຶ້ນເປັນ 60% ໃນບໍລິສັດ ທ່າເຮືອສາກົນ ລາວ-ຫວຽດນາມ

ກະຊວງການເງິນ ໄດ້ຈັດກອງປະຊຸມປຶກສາຫາລືການເພີ່ມອັດ ຕາການຖືຮຸ້ນຂອງລັດຖະບານລາວ ຈາກ 20% ຂຶ້ນເປັນ 60% ໃນບໍລິສັດ ຮຸ້ນສ່ວນທ່າເຮືອສາກົນລາວ-ຫວຽດນາມ (VLP). ໂດຍການເປັນປະທານຂອງທ່ານ ບຸນປອນ ວັນນະຈິດ ຮອງລັດຖະມົນຕີກະຊວງການເງິນ,
ຫົວໜ້າຄະນະກຳມະການເຈລະຈາຝ່າຍລາວ ພ້ອມດ້ວຍຄະນະ, ມີທ່ານ ຫງວຽນ ແອງຖັງ ປະທານສະພາບໍລິຫານບໍລິສັດຮຸ້ນສ່ວນ ທ່າເຮືອສາກົນລາວ-ຫວຽດ, ພ້ອມດ້ວຍຄະນະ, ພ້ອມດ້ວຍພາກສ່ວນທີກ່ຽວຂ້ອງເຂົ້າຮ່ວມ.


ກອງປະຊຸມຄັ້ງນີ້ ມີຈຸດປະສົງເພື່ອໃຫ້ຄະນະສອງຝ່າຍ ລາວ-ຫວຽດນາມ ໄດ້ສະເໜີລາຍງານຄວາມຄືບໜ້າ, ພ້ອມກັນປຶກສາຫາລືແລກປ່ຽນຄຳຄິດຄຳເຫັນ, ເພື່ອແກ້ໄຂບັນຫາຕ່າງໆ ທີ່ຕິດພັນບັນ ຫາທີ່ທັງສອງຝ່າຍ ຍັງບໍ່ທັນເປັນເອກະພາບກັນ,
ພ້ອມທັງກຳນົດທິດທາງໃນຕໍ່ໜ້າກ່ຽວກັບວຽກງານການເພີ່ມອັດຕາການຖືຮຸ້ນຂອງລັດຖະບານລາວ ຈາກ 20% ຂຶ້ນເປັນ 60% ໃນບໍລິສັດຮຸ້ນສ່ວນທ່າ ເຮືອສາກົນລາວ-ຫວຽດ ກໍຄືການຈັດຕັ້ງຜັນຂະຫຍາຍອະນຸສັນຍາ ລະຫວ່າງລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ວ່າດ້ວຍການຮ່ວມມືລົງທຶນພັດທະນາທ່າທຽບເຮືອ 1, 2 ແລະ 3 ຂອງທ່າເຮືອຫວຸ້ງອ່າງສະບັບລົງວັນທີ 6 ທັນວາ 2020.


ເພື່ອສືບຕໍ່ແກ້ໄຂບັນຫາຕ່າງໆ ບົນພື້ນຖານຮັກສາສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ໃຫ້ສຳເລັດຕາມເປົ້າໝາຍ, ຄະນະສອງຝ່າຍ ລາວ-ຫວຽດນາມ ໄດ້ເຫັນດີເປັນເອກະພາບເຖິງຄວາມຈຳເປັນໃນການລາຍງານຄວາມຄືບໜ້າວ່າດ້ວຍຜົນການເຈລະຈາ ແລະ ບັນຫາທີ່ຍັງຄົງຄ້າງເຖິງສອງກົມການເມືອງ ແລະ ສະເໜີຂໍທິດຊີ້ນຳເພື່ອແກ້ໄຂບັນດາບັນຫາດັ່ງກ່າວໃຫ້ສຳເລັດຕາມລະດັບຄາດໝາຍ.

ข่าวทั่วไป