ຜູ້ລັກລອບຂຸດຄົ້ນແຮ່ຄຳ ຢູ່ແຂວງໄຊສົມບູນ ໄດ້ຮັບການປ່ອຍຕົວ

ຜູ້ລັກລອບຂຸດຄົ້ນແຮ່ຄຳ ຢູ່ແຂວງໄຊສົມບູນ ໄດ້ຮັບການປ່ອຍຕົວ

ຕາມຂ່າວສານວຽງຈັນທາຍໃຫ້ຮູ້ວ່າ: ພິທີມອບຜູ້ກະທໍາຜິດ ຈໍານວນ 17 ຄົນ ທີ່ເຂົ້າມາລັກລອບຂຸດຄົ້ນແຮ່ຄໍາ ແບບບໍ່ຖືກຕ້ອງຕາມກົດໝາຍ ຢູ່ແຂວງໄຊສົມບູນ ໃຫ້ແກ່ອໍານາດການປົກຄອງ ແລະ ຍາດພີ່ນ້ອງກັບຄືນເຮືອນຊານ ໄດ້ຈັດຂຶ້ນໃນວັນທີ 2 ມີຖຸນາ 2022 ນີ້ ຜ່ານມານີ້ ທີ່ກອງບັນຊາການປ້ອງກັນຄວາມສະຫງົບ ແຂວງໄຊສົມບູນ, ໂດຍການເຂົ້າຮ່ວມເປັນປະທານຂອງທ່ານ ພັອ ອິນປັນ ຍາດຕິວົງ ຮອງຫົວໜ້າກອງບັນຊາການປ້ອງກັນຄວາມສະຫງົບ ແຂວງໄຊສົມບູນ, ມີທ່ານ ແສງເດືອນ ໄຊຍະເດັດ ຮອງຫົວໜ້າຫ້ອງການປ້ອງກັນຊາດ-ປ້ອງກັນຄວາມສະຫງົບແຂວງ ພ້ອມດ້ວຍພາກສ່ວນທີ່ກ່ຽວຂ້ອງ ເຂົ້າຮ່ວມ.

 

ຜູ້ກະທໍາຜິດທີ່ເຂົ້າມາລັກລອບຂຸດຄົ້ນແຮ່ທາດ ຈໍານວນ 17 ຄົນ ແມ່ນມາຈາກ ແຂວງຊຽງຂວາງ, ຫຼວງພະບາງ, ບໍລິຄໍາໄຊ ແລະ ພາຍໃນແຂວງໄຊສົມບູນ, ຊຶ່ງການກະທໍາຜິດດັ່ງກ່າວ ແມ່ນໄດ້ສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອບໃຫ້ແຂວງໄຊສົມບູນ ຊຶ່ງເປັນການກະທໍາທີ່ຜິດຕໍ່ປະມວນກົດໝາຍອາຍາ, ກົດໝາຍວ່າດ້ວຍການປົກປັກຮັກສາສິ່ງແວດລ້ອມ ແລະ ກົດໝາຍວ່າດ້ວຍແຮ່ທາດ. ນອກນັ້ນ ຖ້າຫາກມີກໍລະນີເກີດອຸປະຕິເຫດຕ່າງໆ ອາດຈະສົ່ງຜົນເຖິງສຸຂະພາບ, ຊີວິດ, ຊັບສິນຂອງຜູ້ກ່ຽວ ແລະ ຂອງລັດ.

ໃນໂອກາດນີ້, ທ່ານ ພັອ ອິນປັນ ຍາດຕິວົງ ໄດ້ມີຄໍາເຫັນໂອ້ລົມ ເພື່ອເປັນການສຶກສາອົບຮົມ ຜູ້ກະທໍາຜິດ ທີ່ເຂົ້າມາລັກລອບຂຸດຄົ້ນແຮ່ທາດ ແບບບໍ່ຖືກຕ້ອງຕາມກົດໝາຍ ຢູ່ແຂວງໄຊສົມບູນ ໂດຍທ່ານໄດ້ຍົກເອົາກົດໝາຍຕ່າງໆ ທີ່ຕິດພັນກັບວຽກງານດັ່ງກ່າວ ມາເຜີຍແຜ່ເຊື່ອມຊຶມ ເພື່ອໃຫ້ເຂົາເຈົ້າໄດ້ຮັບຮູ້, ເຂົ້າໃຈ ຢ່າງເລິກເຊິ່ງ ຕໍ່ແນວທາງນະໂຍບາຍ ຂອງພັກ ແລະ ລະບຽບກົດໝາຍຂອງລັດ. ພ້ອມນັ້ນ ທ່ານຍັງໄດ້ເນັ້ນໜັກໃຫ້ຜູ້ກະທໍາຜິດດັ່ງກ່າວນີ້ ຈົ່ງເອົາໃຈໃສ່ປັບປຸງຕົນເອງ ໄປໃນທາງທີ່ດີ ກໍຄືການທໍາມາຫາກິນ ດ້ວຍອາຊີບທີ່ສຸດຈະລິດ ບໍ່ຜິດຕໍ່ລະບຽບກົດໝາຍຂອງບ້ານເມືອງ ເພື່ອ ແນໃສ່ຮັບປະກັນ ໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ.
ແຫຼ່ງຂ່າວ: ແຂວງໄຊສົມບູນ

ข่าวทั่วไป