ອັດຕາເງິນເຟີ້ເດືອນເມສາ ເພີ່ມຂຶ້ນ 9,9% ທຽບໃສ່ເດືອນດຽວກັນປີຜ່ານມາ

ອັດຕາເງິນເຟີ້ເດືອນເມສາ ເພີ່ມຂຶ້ນ 9,9% ທຽບໃສ່ເດືອນດຽວກັນປີຜ່ານມາ

ຈາກຂໍ້ມູນບົດລາຍງານສະພາບອັດຕາເງິນເຟີ້ ປະຈຳເດືອນເມສາ 2022 ຂອງສູນສະຖິຕິແຫ່ງຊາດ, ກະຊວງແຜນການ ແລະ ການລົງທຶນ​ ໃຫ້ຮູ້ວ່າ: ອັດຕາເງິນເຟີ້ລວມເດືອນເມສາ 2022 ທຽບກັບ ເດືອນດຽວກັນຂອງປີຜ່ານມາ ເພີ່ມຂຶ້ນ 9,9% ຊຶ່ງເປັນການເພີ່ມຂຶ້ນຢ່າງຕໍ່ເນື່ອງ

ໂດຍມີສາເຫດສໍາຄັນມາຈາກການເພີ່ມຂຶ້ນຂອງພະລັງງານໃນຕະຫຼາດໂລກ ຈາກສະຖານະການຄວາມຂັດແຍ່ງ ລະຫວ່າງຣັດເຊຍ ແລະ ຢູ່ເຄຣນ, ສົ່ງຜົນໃຫ້ລາຄາຂາຍຍ່ອຍນໍ້າມັນເຊື້ອໄຟ ພາຍໃນປະເທດປັບເພີ່ມຂຶ້ນ 86,3%.


ເຖິງຢ່າງໃດກໍຕາມ, ລັດຖະບານ ກໍໄດ້ມີມາດຕະການຄຸ້ມຄອງ ເພື່ອຊ່ວຍເຫຼືອຄ່າຄອງຊີບໃຫ້ແກ່ປະຊາຊົນເປັນໄລຍະຢ່າງຕໍ່ເນື່ອງ, ລາຄາສິນຄ້າໃນໝວດອາຫານ ແລະ ເຄື່ອງດື່ມບໍ່ມີທາດເຫຼົ້າ ແມ່ນປັບຕົວເພີ່ມຂຶ້ນເຊັ່ນກັນໂດຍສະເພາະແມ່ນ ເຂົ້າຈີ່ ແລະ ທາດແປ້ງ, ຊີ້ນ, ປາ ແລະ ອາຫານທະເລ, ນົມ, ເນີຍ, ໄຂ່, ນໍ້າມັນພືດ, ໝາກໄມ້, ຜັກສົດ ແລະ ເຄື່ອງປຸງແຕ່ງອາຫານ

ເນື່ອງຈາກຕົ້ນທຶນການຜະລິດເພີ່ມຂຶ້ນ. ນອກນັ້ນ, ໝວດສິນຄ້າ ແລະ ບໍລິການອື່ນໆ ເພີ່ມຂຶ້ນ 16,3% ໂດຍສະເພາະແມ່ນປະເພດວັດຖຸມີຄ່າ ເຊັ່ນ: ຄຳສຳເລັດຮູບ ເພີ່ມຂຶ້ນ 36,8%.


ຂໍ້ມູນ: ສູນສະຖິຕິແຫ່ງຊາດ

ข่าวทั่วไป