ມົນລະພິດທາງອາກາດຂ້າຊີວິດຊາວໂລກ 9 ລ້ານຄົນຕໍ່ປີ

ມົນລະພິດທາງອາກາດຂ້າຊີວິດຊາວໂລກ 9 ລ້ານຄົນຕໍ່ປີ

ຂ່າວຕ່າງປະເທດລາຍງານ ເມື່ອວັນທີ 18 ພຶດສະພາທີ່ຜ່ານມານີ້, ທິມນັກວິທະຍາສາດລາຍງານວ່າ ມົນລະພິດທາງອາກາດທີ່ຮ້າຍແຮງເຮັດໃຫ້ມີປະຊາຊົນທົ່ວໂລກເສຍຊີວິດຈາກການປົນເປື້ອນໃນສິ່ງແວດລ້ອມປະມານ 9 ລ້ານຄົນຕໍ່ປີ ນັບຕັ້ງແຕ່ປີ 2015 ເປັນຕົ້ນມາ ໂດຍປະເທດໃນທະວີບອາຟຣິກາໄດ້ຮັບຜົນກະທົບຫຼາຍທີ່ສຸດ.

ອີງຕາມຂໍ້ມູນຈາກການວິເຄາະຂອງນັກວິທະຍາສາດໃນເລື່ອງການເສຍຊີວິດທົ່ວໂລກ ແລະ ລະດັບມົນລະພິດລະບຸວ່າ ມົນລະພິດທາງອາກາດຈາກລະບົບຂະບວນການອຸດສາຫະກຳລວມໄປເຖິງການຂະຫຍາຍເນື້ອທີ່ເມືອງເຮັດໃຫ້ການເສຍຊີວິດທີ່ກ່ຽວກັບມົນລະພາວະເພີ່ມຂຶ້ນ 7% ຈາກປີ 2015-2019.

ທ່ານ ຣິຊາດ ຟູນເລີ ຜູ້ຂຽນການສຶກສາຄົ້ນຄວ້າຮ່ວມ ແລະ ຫົວໜ້າຂອງອົງກອນບໍ່ສະແຫວງຫາຜົນກຳໄລລະດັບນາໆຊາດ (ພຽວ ເອີສ) ກ່າວວ່າ ມັນຄືກັບພວກເຮົານັ່ງຢູ່ໃນໝໍ້ຕົ້ມ ແລະ ກໍາລັງຖືກເຜົາໃໝ້ຢ່າງຊ້າໆ ແຕ່ບໍ່ຄືກັບການປ່ຽນແປງສະພາບພູມອາກາດ, ໂຣກມາລາເຣຍ ຫຼື HIV ພວກເຮົາບໍ່ໃຫ້ຄວາມສຳຄັນຕໍ່ມົນລະພິດທາງສິ່ງແວດລ້ອມຫຼາຍພຽງພໍ.

ເຖິງແມ່ນວ່າການເສຍຊີວິດຈາກມົນລະພິດດັ້ງເດີມເຊັ່ນ ຄວັນໃນຕຶກອາຄານ ຫຼື ນ້ຳເນົ່າເສຍຈະຫຼຸດລົງທົ່ວໂລກ ແຕ່ມັນຍັງເປັນບັນຫາໃຫຍ່ໃນທະວີບອາຟຣິກາ ແລະ ປະເທດກຳລັງພັດທະນາບາງປະເທດໄດ້ແກ່ ສາທາລະນະລັດ ຊາດ, ສາທາລະນະລັດອາຟຣິກາກາງ ແລະ ນີເຊ ຄື 3 ປະເທດທີ່ມີການເສຍຊີວິດທີ່ກ່ຽວຂ້ອງກັບມົນລະພິດຫຼາຍທີ່ສຸດ.

ນອກຈາກນີ້, ທ່ານ ເຣເຊນ ຄຸບກາ ຜູ້ຂຽນຮ່ວມ ແລະ ກຳມະການບໍລິຫານຂອງພັນທະມິດໂລກດ້ານສຸຂະພາບ ແລະ ມົນລະພິດ (GAHP) ໃນນະຄອນນິວຢອກກ່າວວ່າ ການເສຍຊີວິດທີ່ເກີດຈາກການສຳຜັດມົນລະພິດສະໄໝໃໝ່ເຊັ່ນ: ເຫຼັກໜັກ, ສານເຄມີຈາກການກະເສດ ແລະ ການປ່ອຍອາຍພິດນ້ຳມັນເຊື້ອໄຟເພີ່ມຂຶ້ນແບບສູງທີ່ສຸດເຖິງ 66% ນັບຕັ້ງແຕ່ປີ 2000.

ข่าวทั่วไป