ກອງບັນຊາການທະຫານແຂວງ ບໍ່ແກ້ວ ປັບປຸງກໍ່ສ້າງກໍາລັງໃຫ້ມີຄວາມເຂັ້ມແຂງ ທາງດ້ານກໍາລັງແຮງກາຍ, ແຮງໃຈ ແລະ ສິລະປະຍຸດ – ຍຸດທະວິທີ

ກອງບັນຊາການທະຫານແຂວງ ບໍ່ແກ້ວ ປັບປຸງກໍ່ສ້າງກໍາລັງໃຫ້ມີຄວາມເຂັ້ມແຂງ ທາງດ້ານກໍາລັງແຮງກາຍ, ແຮງໃຈ ແລະ ສິລະປະຍຸດ – ຍຸດທະວິທີ

ວຽກງານອົບຮົມ – ຫັດແອບ, ປັບປຸງລະບຽບແບບແຜນ, ຝຶກຝົນກໍາລັງແຮງກາຍ ແມ່ນວຽກງານໜຶ່ງ ທີ່ມີທີີ່ຕັ້ງ, ພາລະບົດບາດສໍາຄັນ, ຕັດສິນເຖິງຄຸນນະພາບສັງລວມ, ກໍາລັງແຮງສູ້ຮົບ ແລະ ການກໍາເນີດເຕີບໃຫຍ່ຂະຫຍາຍຕົວ ກໍຄືຄວາມເຂັ້ມແຂງຂອງກອງທັບ ໃນນີ້ສະເພາະຢູ່ກອງບັນຊາການທະຫານແຂວງ ບໍ່ແກ້ວ ແມ່ນກົມກອງໜຶ່ງ ທີ່ໄດ້ເອົາໃຈໃສ່ນໍາພາ – ຊີ້ນໍາຈັດຕັ້ງປະຕິບັດວຽກງານອົບຮົມ – ຫັດແອບ, ປັບປຸງກໍ່ສ້າງກໍາລັງຢ່າງເປັນຂະບວນການຟົດຟື້ນຕໍ່ເນື່ອງ

ສາມາດຮັບປະກັນເຮັດໃຫ້ພະນັກງານ – ນັກຮົບໃນກົມກອງມີສຸຂະພາບແຂງແຮງ, ທົນທານໜຽວແໜ້ນ, ມີພິກໄຫວ, ມີຄວາມສໍານິສໍານານຕໍ່ການຈັດຕັ້ງປະຕິບັດໜ້າທີ່ວຽກງານປົກປັກຮັກສາ ແລະ ສ້າງສາພັດທະນາປະເທດຊາດຕາມການມອບໝາຍຂອງຂັ້ນເທິງ ໃນທຸກສະພາບການ.


ສະຫາຍພັນເອກ ທອງໄຂ ສີຍະລາດ ຮອງເລຂາຄະນະພັກ ຫົວໜ້າການທະຫານ ກອງບັນຊາການທະຫານແຂວງ ບໍ່ແກ້ວ ໄດ້ໃຫ້ຮູ້ວ່າ: ໃນຕະຫຼອດໄລຍະ 1 ປີທີ່ຜ່ານມາ ຄະນະພັກ – ຄະນະບັນຊາ, ພະນັກງານທີ່ຮັບຜິດຊອບວຽກງານອົບຮົມ – ຫັດແອບ, ພະນັກງານ – ນັກຮົບທົ່ວກົມກອງ ໄດ້ພ້ອມກັນຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ສຸມໃສ່ການຈັດຕັ້ງປະຕິບັດວຽກງານອົບຮົມ – ຫັດແອບ ຕາມແຜນການຂອງຂັ້ນເທິງຢ່າງຕໍ່ເນື່ອງ ເຊິ່ງສາມາດຍາດໄດ້ຜົນສໍາເລັດອັນຈົບງາມ ໃນນີ້ໄດ້ຖືເອົາພາກທິດສະດີ, ຫຼັກການເປັນພື້ນຖານ, ພາກປະຕິບັດຕົວຈິງເປັນບັນຫາສໍາຄັນ,

ພາຍຫຼັງທີ່ບັນດາກົມກອງໄດ້ຈັດຕັ້ງອົບຮົມຫັດແອບໄຕມາດ 2 ສໍາເລັດແລ້ວ ກົມກອງ, ເຫຼົ່າຮົບໄດ້ມີການຈັດຕັ້ງລວບລວມບົດຮຽນລະອຽດຄືນ ເພື່ອພ້ອມກັນປະສານສຽງແຕກກວດກາບົດຮຽນ ຮັບປະກັນຄວາມຖືກຕ້ອງຕາມລະບຽບຫຼັກການ ຮັກສາໄດ້ຄວາມປອດໄພ 100% ເປັນຕົ້ນແມ່ນກອງຮ້ອຍ 31 ປືນໃຫຍ່ໜ້າດິນ ໄດ້ສໍາເລັດຊ້ອມຮົບຍິງລູກປືນແທ້ 120 ມມ ຈໍານວນ 15 ວັນ ມີຜູ້ເຂົ້າຮ່ວມ 63 ສະຫາຍ ຕີລາຄາຜົນໄດ້ຮັບ 80%,

ໂຮງຮຽນທະຫານທ້ອງຖິ່ນເປີດຊຸດອົບຮົມກໍ່ສ້າງນາຍສິບຊຸດທີ II, 53 ສະຫາຍ 309 ວັນ, ຜົນໄດ້ຮັບ 85%, ພະແນກອົບຮົມ, ພະແນກສູ້ຮົບລົງກວດກາລະບຽບ ແລະ ການກຽມພ້ອມສູ້ຮົບ ບັນດາກົມກອງໃນທົ່ວແຂວງ ຊຸດທີ VIII, 23 ກົມກອງ, ກໍານົດເວລາ 15 ວັນ, ມີຜູ້ເຂົ້າຮ່ວມ 328 ສະຫາຍ ເທົ່າກັບ 75%, ອົບຮົມວຽກງານການເມືອງ 81%, ການທະຫານ 80,21%, ກິລາການທະຫານ 70%, ສິນລະປະຍຸດທະຫານຮາບ 80%, ຍຸດທະວິທີທະຫານຮາບ 78%, ແລະ ອົບຮົມວຽກງານພະລາທິການ – ເຕັກນິກ ສໍາເລັດ 75%

ໃນນີ້ກົມກອງໄດ້ເລັ່ງໃສ່ການຈັດຕັ້ງປະຕິບັດລະບຽບວິໄນຂອງກອງທັບ ໂດຍສະເພາະແມ່ນ 7 ລະບອບ 18 ວຽກ, ການນໍາໃຊ້ເຄື່ອງແບບຂອງບຸກຄົນ, ລະບອບເຄົາລົບລາຍງານ, ລະບຽບບຸກຄົນ, ລະບຽບພິທີການ ແລະ ອຶ່ນໆ ອັນໄດ້ເຮັດໃຫ້ກົມກອງມີລະບຽບວິໄນເຂັ້ມງວດ ແລະ ມີຄວາມໜັກແໜ້ນເຂັ້ມແຂງ ຕາມທິດກໍ່ສ້າງກອງທັບປະຕິວັດ, ມີລະບຽບແບບແຜນທັນສະໄໜ.


ສະຫາຍພັນເອກ ທອງໄຂ ສີຍະລາດ ຍັງໄດ້ໃຫ້ຮູ້ຕື່ມອີກວ່າ: ນອກຈາກນີ້ຜ່ານມາ ກົມກອງຍັງໄດ້ເປັນເຈົ້າການສຸມໃສ່ວຽກງານສຶກສາປ້ອງກັນຊາດ – ປ້ອງກັນຄວາມສະຫງົບ ຈັດຕັ້ງອົບຮົມພະນັກງານການນໍາເປົ້າໝາຍ 3, ອົບຮົມກອງຫຼອນ, ອົບຮົມບ້ານປ້ອມໝັ້ນ, ກຸ່ມບ້ານສູ້ຮົບຕິດລຽນຂອບເຂດກົມກອງຮັບຜິດຊອບສໍາເລັດຕາມແຜນການ ແລະ ອົບຮົມ – ຫັດແອບວຽກງານສຶກສາກິລາປ້ອງກັນຊາດ

ໃຫ້ນັກສຶກສາວິທະຍາໄລທອງສະບາ 162 ຄົນ, ຍິງ 101 ຄົນ ຜົນໄດ້ຮັບເທົ່າກັບ 72%, ອົບຮົມ – ຫັດແອບວິຊາພື້ນຖານປ້ອງກັນໂຕໃຫ້ນັກຮຽນໂຮງຮຽນມໍປາຍໃນທົ່ວແຂວງ 4 ໂຮງຮຽນ, ມີຜູ້ເຂົ້າຮ່ວມ 796 ຄົນ, ຍິງ 339 ຄົນ ສະເລ່ຍຜົນໄດ້ຮັບ 80,5% ຜ່ານການຈັດຕັ້ງອົບຮົມຫັດແອບຕົວຈິງ ເຮັດໃຫ້ທຸກຄົນມີຄວາມຮັບຮູ້ເຂົ້າໃຈ ແລະ ເຫັນໄດ້ຄວາມໝາຍຄວາມສໍາຄັນຕໍ່ວຽກງານປ້ອງກັນຊາດ – ປ້ອງກັນຄວາມສະຫງົບ ການເປັນກໍາລັງແຮງອັນສໍາຄັນເຂົ້າໃນວຽກງານປົກປັກຮັກສາ ແລະ ສ້າງສາພັດທະນາປະທເດຊາດໄດ້ເປັນຢ່າງດີ.


ເພື່ອເຮັດໃຫ້ການຈັດຕັ້ງປະຕິບັດວຽງານອົບຮົມ – ຫັດແອບມີຄວາມໜັກແໜ້ນເຂັ້ມແຂງຂຶ້ນເລື້ອຍໆ ໃນຕໍ່ໜ້າຄະນະພັກ – ຄະນະບັນຊາ, ຜູ້ຮັບຜິດຊອບຊີ້ນໍາວຽກງານອົບຮົມ – ຫັດແອບທຸກຂັ້ນໃນທົ່ວກົມກອງ ຈະໄດ້ພ້ອມກັນສືບຕໍ່ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ເອົາໃຈໃສ່ເພີ່ມທະວີວຽກງານສຶກສາອົບຮົມການເມືອງນໍາພາແນວຄິດໃຫ້ພະນັກງານ – ນັກຮົບ ມີຄວາມຮັບຮູ້ເຊື່ອມຊືມຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ຂໍ້ກໍານົດກົດລະບຽບຂອງກອງທັບ

ພ້ອມກັນເຫັນໄດ້ຄວາມໝາຍຄວາມສໍາຄັນຕໍ່ວຽກງານອົບຮົມ – ຫັດແອບ, ປັບປຸງລະບຽບແບບແຜນ, ຝຶກຝົນກໍາລັງແຮງກາຍ ເປັນເຈົ້າການເຂົ້າຮ່ວມການອົບຮົບ – ຫັດແອບໃນແຕ່ລະໄລຍະ ຕາມຄໍາສັ່ງແນະນໍາຂອງຂັ້ນເທິງ ທີ່ກົມກອງຈັດຂຶ້ນໃຫ້ມີຂະບວນການຟົດຟື້ນ ແນໃສ່ເຮັດໃຫ້ກົມກອງມີຄວາມໜັກແໜ້ນເຂັ້ມແຂງໃນທຸກໆ ດ້ານ ກຽມພ້ອມເຮັດສໍາເລັດໜ້າທີ່ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມຄວາມໄວ້ເນື້ອເຊື່ອໃຈຂອງຂັ້ນເທິງດ້ວຍໝາກຜົນອັນຈົບງາມ.

ข่าวทั่วไป