ຮ່ຳຮຽນເອົາແບບຢ່າງທີ່ຍອດຍິ່ງຈາກປະທານ ໂຮ່ຈິມິນ ຜູ້ນຳການປະຕິວັດຊາດ ແລະ ສ້າງຕັ້ງພັກກອມມູນິດອິນດູຈີນ

ຮ່ຳຮຽນເອົາແບບຢ່າງທີ່ຍອດຍິ່ງຈາກປະທານ ໂຮ່ຈິມິນ ຜູ້ນຳການປະຕິວັດຊາດ ແລະ ສ້າງຕັ້ງພັກກອມມູນິດອິນດູຈີນ

(ເນື່ອງໃນໂອກາດວັນເກີດຂອງປະທານ ໂຮ່ຈິມິນ ຄົບຮອບ 132 ປີ, 19/5/1890-19/5/2022)
ສຸລິຍາ ເພັງໄຊຕີ
ສະຖາບັນຄົ້ນຄວ້າການເມືອງວິທະຍາ
ເພື່ອເປັນການລະນຶກເຖິງປະທານ ໂຮ່ຈິມິນ ຜູ້ນຳທີ່ຍິ່ງໃຫຍ່ ແລະ ເຄົາລົບຮັດຂອງປະຊາຊົນຫວຽດນາມ ທີ່ບັນຈົບຄົບຮອບ 132 ປີ, ໃນວັນທີ 19 ພຶດສະພາ 2022 ແລະ ເພື່ອເປັນການສະແດງອອກເຖິງຄວາມຮູ້ບຸນຄຸນຢ່າງລົ້ນເຫຼືອ ນໍ້າໃຈສາມັກຄີຮັກແພງ ຂອງປະທານ ໂຮ່ຈິມິນ ກໍຄືປະຊາຊົນຫວຽດນາມ ຕໍ່ການປະຕິວັດ ແລະ ປະຊາຊົນລາວ ເປັນການເພີ່ມທະວີຮັດແໜ້ນຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໃຫ້ນັບມື້ນັບແໜ້ນແຟ້ນຂຶ້ນເລື້ອຍໆ.

ປະທານ ໄກສອນ ພົມວິຫານ ໄດ້ກ່າວປາໄສໃນພິທີໄວ້ອາໄລເຖິງປະທານ ໂຮ່ຈິມິນ ໃນປີ 1969 ໄວ້ວ່າ: “ຕະ ຫຼອດຊີວິດແຫ່ງການເຄື່ອນໄຫວປະຕິວັດ ຍາມໃດປະທານ ໂຮ່ຈິມິນ ກໍໄດ້ຄຳນຶງເຖິງປະເທດຊາດ ແລະ ປະຊາຊົນ; ສະຫາຍໄດ້ເວົ້າວ່າ: ຕາບໃດທີ່ປະເທດຊາດ ແລະ ປະຊາຊົນ ຍັງບໍ່ທັນໄດ້ຮັບການປົດປ່ອຍ, ຂ້ອຍກິນບໍ່ແຊບນອນບໍ່ຫຼັບ, ບໍ່ມີສິ່ງໃດປະເສີດເລີດລໍ້າກວ່າເອກະລາດ, ອິດສະຫຼະພາບ. ພວກເຮົາຍອມເສຍສະຫຼະໝົດທຸກສິ່ງທຸກຢ່າງ ແຕ່ເດັດຂາດບໍ່ຍອມເສຍປະເທດຊາດ ບໍ່ຍອມເປັນຂ້ອຍຂ້າ.

ຈາກນີ້ສະຫາຍ ໄດ້ເອົາການຮັບໃຊ້ປະເທດຊາດ, ຮັບໃຊ້ປະຊາຊົນ ເປັນເຫດຜົນແຫ່ງການດຳລົງຊີວິດຂອງຕົນ. ສະຫາຍ ຮັບຮູ້ຢ່າງເລິກເຊິ່ງວ່າ ການປະຕິວັດເປັນພາລະກິດຂອງມະຫາຊົນທີ່ຢູ່ພາຍໃຕ້ການນຳພາຂອງພັກ. ສະຫາຍ ໄດ້ສັ່ງສອນວ່າ: ປະຊາຊົນ ເປັນກຳລັງອັນຍິ່ງໃຫຍ່, ປະຊາຊົນ ເຮັດວຽກງານຫຍັງກໍສຳເລັດ, ຕ້ອງເຊື່ອໝັ້ນ ແລະ ອີງໃສ່ປະຊາຊົນ, ອົດທົນໜຽວແໜ້ນຂົນຂວາຍປະຊາຊົນ ລຸກຂຶ້ນເຮັດການປະຕິວັດ.


ອັນເດັ່ນເປັນພິເສດກວ່າໝູ່ຂອງປະທານ ໂຮ່ຈິມິນ ແມ່ນສິນທຳປະຕິວັດ ແລະ ແບບແຜນດຳລົງຊີວິດອັນຈົບງາມ. ນັບຕັ້ງແຕ່ເປັນນັກຮົບປະຕິວັດທຳມະດາ ຈົນເຖິງຂັ້ນໄດ້ເປັນປະທານພັກ ແລະ ປະທານປະເທດ, ປະທານ ໂຮ່ຈິມິນ ຍາມໃດກໍໄດ້ເຊີດຊູລັດທິວິລະຊົນປະຕິວັດ ແລະ ສິນທຳປະຕິວັດ, ເປັນແບບຢ່າງອັນໃສແຈ້ງໃນທຸກດ້ານ, ສ່ອງເຍືອງໃຫ້ທຸກການເຄື່ອນໄຫວຂອງພວກເຮົາ, ສາມັກຄີຮັກແພງເພື່ອນມິດສະຫາຍຢ່າງໝົດອົກໝົດໃຈ, ເຮັດວຽກງານຢ່າງບໍ່ຮູ້ອິດຮູ້ເມື່ອຍ, ວຽກໃຫຍ່ກໍຄິດຄົ້ນຊັ່ງຊາຢ່າງຖີ່ຖ້ວນຄັກແນ່ເພື່ອສຳເລັດ ແຕ່ວຽກນ້ອຍກໍບໍ່ເບິ່ງເບົາປະປ່ອຍ, ດຳລົງຊີວິດແບບສົດໃສຖະ ໜອມຖ່ອມຕົວ ແລະ ງ່າຍດາຍຕະຫຼອດມາ, ຢູ່ກິນຄືມະຫາຊົນ, ໃກ້ຊິດຕິດແທດ ແລະ ເຈືອຈານກັບມະຫາຊົນ.

ຕໍ່ການປະຕິວັດລາວພວກເຮົາ, ປະທານ ໂຮ່ຈິມິນ ໄດ້ເປັນຫ່ວງເປັນໄຍຊີ້ນຳອົງຄະນະພັກກອມມູນິດອິນດູຈີນ ປະຈຳລາວ ໃນເມື່ອກ່ອນ ກໍຄືພັກປະຊາຊົນລາວໃນເມື່ອໄດ້ຮັບການສ້າງຕັ້ງຂຶ້ນໃນໄລຍະຕໍ່ມານັ້ນຢູ່ສະເໝີ. ສະຫາຍ ໄດ້ຊ່ວຍຄວາມຄິດຄວາມເຫັນອັນສຳຄັນທີ່ສຸດທາງດ້ານຍຸດທະສາດ, ຍຸດໂທບາຍ, ແບບວິທີເຄື່ອນໄຫວໃຫ້ພວກເຮົາໂດຍກົງ.

ຍ້ອນແນວນັ້ນ, ໃນສະພາບການອັນແສນຫຍຸ້ງຍາກລຳບາກ ອົງຄະນະພັກກອມມູນິດອິນດູຈີນ ປະຈຳລາວ ຈິ່ງໄດ້ອອກແຮງຂົນຂວາຍມະຫາຊົນ, ຈັດຕັ້ງ ແລະ ນຳພາປະຊາຊົນເຮົາ ລຸກຂຶ້ນເຮັດການປະຕິວັດເດືອນສິງຫາສຳເລັດຜົນ, ຍາດເອົາອຳນາດການປົກຄອງມາມືຂອງຕົນ, ປະກາດຄວາມເປັນເອກະລາດຂອງປະເທດລາວ ໃນວັນທີ 12 ຕຸລາ 1945.

ຕ້ອງເປັນຄົນຮັບໃຊ້ຜູ້ຈົງຮັກພັກດີຂອງປະຊາຊົນ. ພວກເຮົາໄດ້ສ້າງຕັ້ງພັກປະຊາຊົນລາວຂຶ້ນ ເຖິງແມ່ນວ່າອາຍຸຍັງນ້ອຍກໍຕາມ ແຕ່ພັກເຮົາ ກໍສາມາດນຳພາການປະຕິວັດຜ່ານພົ້ນຄວາມຫຍຸ້ງຍາກສັບສົນ, ຍາດເອົາໄຊຊະນະອັນນັບມື້ນັບໃຫຍ່ຫຼວງມາໄດ້. ຖັນແຖວພະນັກງານຂອງພວກເຮົາ ກໍນັບມື້ນັບເຕີບໃຫຍ່ຂະຫຍາຍຕົວ ແລະ ໄດ້ຮັບການຝຶກຝົນຫຼໍ່ຫຼອມໃນແປວໄຟແຫ່ງການຕໍ່ສູ້ອັນທໍລະຫົດດຸເດືອດ. ສິ່ງທີ່ກ່າວມານັ້ນ ໄດ້ຢັ້ງຢືນວ່າ: ຄຸນງາມຄວາມດີຂອງປະທານ ໂຮ່ຈິມິນ ຕໍ່ການປະຕິວັດຂອງປະເທດເຮົາ ແມ່ນໃຫຍ່ຫຼວງທີ່ສຸດ.

ປະຫວັດສາດຂອງຊາດເຮົາ, ຂອງການປະຕິວັດປະເທດເຮົາ ຈະຈາລຶກຄຸນງາມຄວາມດີຂອງສະຫາຍ ໂຮ່ຈິມິນ ຜູ້ຍິ່ງໃຫຍ່ໄວ້ຈົນເທົ່າທຸກມື້ນີ້. ສະຫາຍ ໂຮ່ຈິມິນ ໄດ້ເປັນນັກຮັກຊາດທີ່ຍິ່ງໃຫຍ່, ເປັນຜູ້ນຳທີ່ຍິ່ງໃຫຍ່ ແລະ ແສນເຄົາລົບຮັກຂອງຊົ້ນຊັ້ນກຳມະກອນ ແລະ ປະຊາຊົນຫວຽດນາມ, ເປັນນັກມາກຊິດ-ເລນິນນິດ ທີ່ແທ້ຈິງ, ເປັນນັກຮົບທີ່ກ້າແກ່ນ ແລະ ດີເລີດຂອງຂະບວນການກອມມູນິດສາກົນ, ເປັນເພື່ອນຮ່ວມຮົບທີ່ໄວ້ວາງໃຈຂອງບັນດາປະຊາຊາດ ທີ່ພວມຕໍ່ສູ້ເພື່ອເອກະລາດ, ອິດສະຫຼະພາບ.

ຄຸນງາມຄວາມດີ ແລະ ແບບແຜນດຳລົງຊີວິດທີ່ປອດໃສຂອງປະທານ ໂຮ່ຈິມິນ ເປັນມູນເຊື້ອ ແລະ ບົດຮຽນອັນສຳຄັນ ໃຫ້ແກ່ພະນັກງານ-ສະມາຊິກພັກພວກເຮົາ ເປັນຕົ້ນແມ່ນຄະນະພັກຂັ້ນຕ່າງໆທີ່ໄດ້ຮ່ຳຮຽນ ແລະ ສຶກສາອົບຮົມໃຫ້ທົ່ວພັກ, ທົ່ວປວງຊົນ ເຂົ້າໃຈໄດ້ເຖິງຄຸນງາມຄວາມດີຂອງປະທານ ໂຮ່ຈິມິນ ກໍຄືພັກ-ລັດ ແລະ ປະຊາຊົນຫວຽດນາມ ທີ່ມີຕໍ່ການປະຕິວັດ, ຕໍ່ຊາດ ແລະ ປະຊາຊົນລາວພວກເຮົາ.

ພ້ອມກັນນັ້ນ, ກໍຫັນເອົາຄວາມຮູ້ບຸນຄຸນດັ່ງກ່າວ ມາເປັນກຳລັງແຮງໃນການເສີມຂະຫຍາຍຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດນາມ ເປັນຕົ້ນແມ່ນການປະຕິບັດແຜນການຮ່ວມມື ລະຫວ່າງ ລັດຖະບານຂອງສອງປະເທດ ທີ່ໄດ້ເຊັນສັນຍາກັນແລ້ວນັ້ນ ໃຫ້ເກີດດອກອອກຜົນສຳເລັດເປັນຢ່າງດີ.

ข่าวทั่วไป