ອັດຕະປື ຊີ້ແຈງບັນຫານໍ້າມັນເຊື້ອໄຟຂາດປໍ້າ

ອັດຕະປື ຊີ້ແຈງບັນຫານໍ້າມັນເຊື້ອໄຟຂາດປໍ້າ

ທ່ານ ພູໄຊ ວໍລະລາດ ຮອງຫົວຫນ້າພະແນກ ອຸດສາຫະກໍາ ແລະ ການຄ້າແຂວງ ໄດ້ໃຫ້ການຊີ້ແຈງ ແລະ ສໍາພາດຕໍ່ສື່ມວນຊົນແຂວງ ຄັ້ງວັນທີ 9 ພຶດສະພາ 20222ວ່າ:

ສາເຫດທີ່ພາໃຫ້ລາຄານໍ້າມັນເຊື້ອໄຟ ໃນປັດຈຸບັນ ຂາດປໍ້າ ແລະ ມີການເຫນັງຕີງໃນແຕ່ລະວັນກໍຍ້ອນຫລາຍສາເຫດກະທົບທັງກົງ ແລະ ທາງອ້ອມ, ດັ່ງທີ່ຮູ້ນໍາກັນແລ້ວວ່າ:ສະພາບການຂອງໂລກ ແລະ ພາກພື້ນ ຍັງສືບຕໍ່ຜັນແປຢ່າງສະຫລັບຊັບຊ້ອນ ມີທັງກະລະໂອກາດ ແລະ ສິ່ງທ້າທາຍ

ຊຶ່ງຄາດຄະເນໄດ້ຍາກ ອັນເນື່ອງມາຈາກການດໍາເນີນນະໂຍບາຍແຂງກະດ້າງ ຂອງອິດທິກໍາລັງຈັກກະພັດນາຍທຶນ ອັນກໍ່ໃຫ້ເກີດຂໍ້ຄັດແຍ່ງດ້ານເສດຖະກິດ-ການຄ້າ,ບັນຫາສົງຄາມຂອງປະເທດລັດເຊຍ-ຢູເຄນ,ເພາະວ່າ ລັດເຊັຍເປັນປະເທດຫນຶ່ງໃນໂລກທີ່ຜະລິດນໍ້າມັນຫລາຍທີ່ສຸດ ໂດຍສະເພາະ ສປປລ ລາວ ພວກເຮົາ ກໍປະເຊີນກັບຄວາມຫຍຸ້ງຍາກດ້ານເສດຖະກິດ-ການເງິນເປັນຕົ້ນ:

ໃນປັດຈຸບັນ ອັດຕາແລກປ່ຽນເງິນຕາ ແລະ ເງິນກີບລາວມີການຫລຸດໂຕນກັນ,ມີການເຫນັງຕີງຕະຫລອດເຮັດໃຫ້ເງິນກີບລາວອ່ອນຄ່າລົງ,ກໍເປັນປັດໃຈກະທົບຂອງການນໍາເຂົ້ານໍ້າມັນເຊື້ອໄຟ,ການຊື້-ຂາຍ,ການສໍາລະດ້ວຍເງິນຕາຕ່າງປະເທດ(ໂດລາ),ການຕອບສະຫນອງບໍ່ໄປຕາມບົດບັນທຶກສັນຍາເບື້ອງຕົ້ນ,ລາຄານໍ້າມັນໃນທຸກໆ3-5ວັນ,ມີການເຫນັງຕີງຂຶ້ນລົງເຮັດໃຫ້ຜູ້ນໍາເຂົ້າພົບຄວາມຫຍຸ້ງຍາກຫລາຍດ້ານ,ດ້ວຍເຫດນີ້,ຈິ່ງພາໃຫ້ນໍ້າມັນເຊື້ອໄຟຂາດປໍ້າ ແລະ ຕອບສະຫນອງບໍ່ທັນກັບຜູ້ຊົມໃຊ້.

ຍິ່ງໄປກວ່ານັ້ນ,ຄວາມເຂົ້າໃຈຂອງຜູ້ດໍາເນີນທຸລະກິດຂາຍນໍ້າມັນເຊື້ອໄຟ ບາງປໍ້າ ແລະ ຜູ້ຄົນໃນສັງຄົມຈໍານວນຫນຶ່ງໄດ້ສວຍໃຊ້ວິກິດເປັນໂອກາດເຊັ່ນ: ກັກຕຸ້ນນໍ້າມັນເພື່ອຂາຍຍ່ອຍ,ດັດປັບລາຄາບໍ່ເອກະພາບຕາມແຈ້ງການ,ເກີດມີການຂາຍຍົກ-ຍ່ອຍເປັນແກ້ວ,ກະຕຸກຕາມຖະຫນົນຫົນທາງ, ຕາມຫນ້າປໍ້າ ຖືວ່າເປັນການລະເມີດຕໍ່ລະບຽບກົດຫມາຍ, ຄໍາສັ່ງ,ລະບຽບການ, ແຈ້ງການຂອງການຈັດຕັ້ງພັກ-ລັດວາງອອກ.

ຕໍ່ກັບບັນຫາດັ່ງກ່າວນີ້, ທາງເຈົ້າຫນ້າທີ່ກໍຄືພະແນກ ອຸດສາຫະກໍາ ແລະ ການແຂວງ, ກໍ່ບໍ່ໄດ້ນິ້ງນອນໃຈ ແລະ ໄດ້ເຮັດຫນ້າທີ່ຢ່າງຕັ້ງງຫນ້າ,ເປັນປະຈໍາ ໂດຍໄດ້ປະສານສົມທົບກັບພາກສ່ວນກ່ຽວຂ້ອງຂອງແຂວງ, ເມືອງ ແລະ ບ້ານ ໃນການລົງເຄື່ອນໄຫວປຸກລະດົມຂົນຂວາຍ,ໃຫ້ການໂຄສະນາຊີ້ແນະ,ກ່າວເຕືອນ ແລະ ສຶກສາອົບຮົມ, ສ້າງບົດບັນທຶກ ພ້ອມທັງປັບໃຫມ ຫລາຍພໍສົມຄວນແຕ່ປະກົດວ່າຍັງມີຜູ້ສືບຕໍ່ລະເມີດ.

ແຕ່ເຖິງຢາງໃດກໍຕາມໃນຕໍ່ຫນ້ານີ້, ຈະໄດ້ເອົາໃຈໃສ່ຢ່າງຈິງຈັງໃນການແກ້ໄຂບັນຫາດັ່ງກ່າວນີ້ໃຫ້ຫລຸດນ້ອຍຖອຍລົງ ແລະ ຂໍຝາກເຖິງສັງຄົມ,ພໍ່ແມ່ປະຊາຊົນໃນທົ່ວແຂວງ ອັດຕະປື ຊ່ວຍເປັນຫູເປັນຕາ,ຕິດຕາມບຸກຄົນໃດ,ປໍ້າໃດທີ່ບໍ່ປະຕິບັດຕາມລະບຽບແຈ້ງການຂອງຂັ້ນເທິງວາງອອກ,ການສວຍໂອກາດດັດປັບລາຄາ,ການຂາຍນໍ້າມັນແກ້ວຕາມທ້ອງຖະຫນົນ, ຫນ້າປໍ້າ ຫລື ກັກຕຸ້ນ ແລະ ອື່ນໆ ສາມາດປະສານ ແລະ ລາຍວານເຈົ້າຫນ້າທີ່ກ່ຽວຂ້ອງ(ສາຍດ່ວນ 1510 ຫລື ເຈົ້າຫນ້າທີ່ພະແນກອຸດສາຫະກໍາ ແລະ ການຄ້າແຂວງ,ເມືອງ 020 55635980, 02022297888.

ຂຽນ: ຊິບປະໄຊ

ข่าวทั่วไป