ກວດພົບຜູ້ຕິດເຊື້ອໂຄວິດ-19 ເພີ່ມໃໝ່ 230 ຄົນ ແລະ ເສຍຊີວິດໃໝ່ 2 ຄົນ

ກວດພົບຜູ້ຕິດເຊື້ອໂຄວິດ-19 ເພີ່ມໃໝ່ 230 ຄົນ ແລະ ເສຍຊີວິດໃໝ່ 2 ຄົນ

ຂປລ. ມາຮອດ ວັນທີ 5 ພຶດສະພາ 2022 ນີ້, ສປປ ລາວ ກວດພົບຜູ້ຕິດເຊື້ອໂຄວິດ-19 ເພີ່ມຂຶ້ນໃໝ່ 230 ຄົນ ໃນນັ້ນ, ຕິດເຊື້ອພາຍໃນ 210 ຄົນ ແລະ ນໍາເຂົ້າ 20 ຄົນ, ເສຍຊີວິດ ເພີ່ມໃໝ່ 2 ຄົນ(ຫລວງພະບາງ 1 ຄົນ ແລະ ອັດຕະປື 1 ຄົນ) ໃນນັ້ນ, ກວດພົບຜູ້ຕິດເຊື້ອ ຢູ່ນະຄອນຫລວງວຽງຈັນ 128 ຄົນ, ຊຽງຂວາງ 12 ຄົນ, ໄຊຍະບູລີ 12 ຄົນ, ວຽງຈັນ 11 ຄົນ, ຫລວງພະບາງ 8 ຄົນ, ອັດຕະປື 7 ຄົນ, ສາລະວັນ 5 ຄົນ, ສະຫັວນນະເຂດ 5 ຄົນ, ຄໍາມ່ວນ 4 ຄົນ, ອຸດົມໄຊ 4 ຄົນ, ຫົວພັນ 3 ຄົນ, ໄຊສົມບູນ 3 ຄົນ, ບໍລິຄໍາໄຊ 3 ຄົນ, ເຊກອງ 2 ຄົນ, ບໍ່ແກ້ວ 1 ຄົນ, ຈໍາປາສັກ 1 ຄົນ ແລະ ແຂວງຜົ້ງສາລີ 1 ຄົນ.


ສ່ວນກໍລະນີນຳເຂົ້າ 20 ຄົນ ແມ່ນຈາກແຂວງສະຫວັນນະເຂດ 9 ຄົນ, ຈໍາປາສັກ 4 ຄົນ, ຄໍາມ່ວນ 4 ຄົນ, ບໍລິຄໍາໄຊ 2 ຄົນ ແລະ ນະຄອນຫລວງວຽງຈັນ 1 ຄົນ ເຊິ່ງທັງໝົດໄດ້ເຂົ້າຈໍາກັດບໍລິເວນຕາມສະຖານທີ່ກໍານົດໄວ້ ກ່ອນຈະກວດພົບເຊື້ອ. ມາຮອດປັດຈຸບັນ ສປປ ລາວ ມີຜູ້ຕິດເຊື້ອສະສົມ ທັງໝົດ 208.368 ຄົນ (ຕິດເຊື້ອພາຍໃນ 192.375 ຄົນ ແລະ ນໍາເຂົ້າ 15.993 ຄົນ), ກຳລັງປິ່ນປົວ 436 ຄົນ, ເສຍຊີວິດສະສົມທັງໝົດ 748 ຄົນ.


ທ່ານ ລັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາ ລະນະສຸກ ລາຍງານໃຫ້ຮູ້ໃນວັນທີ 5 ພຶດສະພາ 2022 ນີ້ວ່າ: ການລະບາດຂອງພະຍາດໂຄວິດ-19 ຢູ່ ສປປ ລາວ ເຫັນວ່າຕົວເລກຜູ້ຕິດເຊື້ອ ແມ່ນຫລຸດລົງ ແລະ ຕໍ່າກວ່າ 500 ຄົນ/ວັນ, ນັບຕັ້ງແຕ່ວັນທີ 27 ເມສາ 2022 ເປັນຕົ້ນມາ ເຊິ່ງເຫັນໄດ້ວ່າ ທ່າອ່ຽງຂອງການລະບາດໃນປະເທດເຮົາ ແມ່ນມີທ່າອ່ຽວຫລຸດລົງ, ພ້ອມດຽວກັນນັ້ນ ອັດຕາຜູ້ຕິດເຊື້ອທີ່ມີອາການເບົາບາງ 62%, ມີອາການປານກາງ 22% ແລະ ອາການໜັກ 16%.


ມາຮອດປັດຈຸບັນ, ສາຍພັນໂອໄມຄຣອນ ໄດ້ແຕກສາຍພັນຍ່ອຍລົງໄປອີກ ເຊັ່ນ: BA.1, BA.2, BA.3, BA.4, BA.5 ແຕ່ລະສາຍພັນຍ່ອຍ ກໍໄດ້ແຕກອອກເປັນສາຍພັນຍ່ອຍລົງໄປອີກ ເຊັ່ນ: BA.1.1, BA.2.1, BA.2.2 ເຊິ່ງສາຍພັນ BA.4 & BA.5 ແມ່ນກຳລັງລະບາດ ຢູ່ອາຟຣິກາໃຕ້ ເຫັນວ່າມີຄວາມສາມາດຫລົບຫລີກພູມຄຸ້ມກັນຂອງຮ່າງ ກາຍ ບໍ່ວ່າຈະເປັນພູມຄຸ້ມກັນ ທີ່ເກີດຈາກການຕິດເຊື້ອທີ່ຜ່ານມາ ຫລື ພູມຄຸ້ມກັນທີ່ເກີດຈາກການສັກວັກຊິນ ແລະ ສາຍພັນດັ່ງກ່າວ ກໍປະກົດຕົວ ຢູ່ໃນຫລາຍປະເທດຂອງທະ ວີບເອີຣົບ ລວມທັງ ຫລາຍລັດຂອງອາເມລິກາ

ສ່ວນຢູ່ ສປປ ລາວ ແມ່ນຍັງບໍ່ທັນກວດເຫັນ ສາຍພັນ BA.4 ແລະ BA.5 ເທື່ອ, ແຕ່ກະຊວງສາທາລະນະສຸກ ຈະໄດ້ສືບຕໍ່ ເຝົ້າລະວັງ ສາຍພັນດັ່ງກ່າວ ລວມທັງສາຍພັນໃໝ່ ທີ່ອາດຈະເກີດຂຶ້ນໃນເງື່ອນໄຂ ທີ່ປະເທດເຮົາ ເປີດປະເທດຢ່າງເຕັມຮູບແບບ ເພື່ອເປັນບ່ອນອີງ ໃຫ້ແກ່ຄະນະສະເພາະກິດໃນການຄົ້ນຄວ້າ ອອກມາດຕະການທີ່ແທດເໝາະກັບຕົວຈິງ,

ສາມາດຄວບຄຸມການລະບາດໃຫ້ຢຸດຕິລົງໂດຍໄວ ໄດ້ແຕ່ຫົວທີ ແລະ ສິ່ງທີ່ພວກເຮົາຈະຕ້ອງເລັ່ງ ກໍຄື ການສັກວັກຊິນ ໃຫ້ແກ່ກຸ່ມເປົ້າໝາຍ ລວມທັງກຸ່ມສ່ຽງ ໃຫ້ບັນລຸສູງກວ່າ 80% ໂດຍໄວ ເພື່ອຫລຸດຜ່ອນອັດ ຕາການຕິດເຊື້ອໂຄວິດ-19 ໃຫ້ເຫລືອໜ້ອຍທີ່ສຸດ ແລະ ຫລຸດຜ່ອນບໍ່ໃຫ້ມີການສູນເສຍຊີວິດ ຍ້ອນບໍ່ໄດ້ສັກວັກຊິນ ປ້ອງກັນພະຍາດໂຄວິດ-19.

ຂ່າວ: ທະນູທອງ

ข่าวทั่วไป