ສານຕັດສິນ ຄົນຮັບໃຊ້ ສີສຸກ ດາວເຮືອງ ຈໍາຄຸກ 7 ປີ

ສານຕັດສິນ ຄົນຮັບໃຊ້ ສີສຸກ ດາວເຮືອງ ຈໍາຄຸກ 7 ປີ

ພາຍຫຼັງ ສານປະຊາຊົນ ນະຄອນຫຼວງວຽງຈັນ ນໍາເອົາສໍານວນຄະດີຢາເສບຕິດລາຍໃຫຍ່ທີ່ມີທ້າວ ສີສຸກ ດາວເຮືອງ ເປັນຫົວໂປ່ໂຕການ ແລະ ມີພັກພວກຮ່ວມຂະບວນການດຽວກັນອີກ 4 ຄົນ ຂຶ້ນມາພິຈາລະນາຕັດສິນໃນ ວັນທີ 3 ມີນາ 2022 ແລະ ໜຶ່ງໃນນັ້ນແມ່ນ ທ້າວ ທົງໄຊ ຫຼື ເຫຼືອກ (ຈຳເລີຍ4) ທີ່ເຄີຍເປັນຄົນຮັບໃຊ້ຈຳເລີຍ1( ສີສຸກ ດາວເຮືອງ ) ສານໄດ້ພິຈາລະນາຕັດສິນ ໃນຂໍ້ຫາມີຢາເສບຕິດປະເພດຢາອີໄວ້ຄອບຄອງ ແລະ ອາວຸດເສີກ ຈໍາຄຸກ 7 ປີ ພ້ອມທັງປັບໃໝ 12 ລ້ານກີບ.

ໃນສຳນວນຄະດີ ປີ 2014 ທ້າວ ທົງໄຊ ຫຼື ເຫຼືອກ ໄດ້ເປັນຄົນຮັບໃຊ້ ທ້າວ ສີສຸກ ດາວເຮືອງ ໄປຕາມສະຖານທີ່ຮ້ານບັນເທິງຕ່າງໆ ໄປແຕ່ລະຄັ້ງ ຈໍາເລີຍ1 ຈະເອົາຢາອີ ໃຫ້ເກັບຮັກສາຄັ້ງລະ 8 ຫາ 10 ເມັດ, ບາງຄັ້ງ ຈຳເລີຍ1 ຍັງບອກໃຫ້ເອົາຢາອີ ໃສ່ຈອກເຫຼົ້າ, ຈອກເບຍ ໄປແຕ່ລະຄັ້ງ ຈຳເລີຍ1 ເອົາເງິນຄ່າຈ້າງໃຫ້ຄັ້ງລະ 1.000 ບາດ, ມາຮອດໄລຍະເດືອນ ມັງກອນ2017 ທ້າວ ໄຊຊະນະ ແກ້ວພິມພາ ຖືກເຈົ້າໜ້າທີ່ປະເທດໄທຈັບຕົວ ແລ້ວຈໍາເລີຍ1

ຈຶ່ງໄດ້ໂທລະສັບບອກໃຫ້ ຈຳເລີຍ4 ມາເອົາປືນຢູ່ເຮືອນຂອງ ຈໍາເລີຍ1 ໄປເກັບມ້ຽນໄວ້ຢູ່ເຮືອນຂອງ ຈຳເລີຍ4 ຈໍານວນ 4 ກະບອກ ຄື: ປືນສັ້ນຍີ່ຫໍ້ກັອກ17 ຈໍານວນ 1 ກະບອກ ພ້ອມລູກຈຳນວນ 15 ລູກ,ປືນສັ້ນບີບີກັນດັດແປງ 1 ກະບອກ ພ້ອມລູກຈຳນວນ 6 ລູກ, ປືນສັ້ນ P238 ສີດໍາ ຈໍານວນ 1ກະບອກພ້ອມລູກຈໍານວນ 2 ລູກ ແລະ ປືນສັ້ນຍີ່ຫໍ້ ຫັນລີ ຈຳນວນ 1 ກະບອກ ພ້ອມລູກຈຳນວນ 5 ລູກ;ນອກນີ້, ຍັງມີລູກປືນອີກຈຳນວນໜຶ່ງທີ່ບໍ່ໄດ້ນັບ;

ມາຮອດວັນທີ 31 ມີນາ 2017 ເວລາ 10:00 ໂມງ ຈໍາເລີຍ1 ໄດ້ໂທລະສັບບອກໃຫ້ ຈໍາເລີຍ4 ໄປຫາຢູ່ເຮືອນຂອງ ເພື່ອເດີນທາງໄປແຂວງ ຫຼວງພະບາງ;ຈາກນັ້ນ, ຈໍາເລີຍ4 ກໍເອົາປືນສັ້ນ P238 ພ້ອມລູກປືນຕິດຕົວໄປນໍາ ຈາກນັ້ນ ຈຳເລີຍ1 ກໍໄດ້ເອົາຢາອີ ໃຫ້ ຈໍານວນ 8 ເມັດ ກ່ອນໄປຂີ່ລົດໄປຮັບເອົາໝູ້ອີກ 2 ຄົນ;

ຈາກນັ້ນ, ກໍພາກັນເດີນທາງໄປແຂວງ ຫຼວງພະບາງໄປຮອດເວລາປະມານ 18:00 ໂມງ ຂອງວັນດຽວກັນ ແລ້ວກໍພາກັນໄປຈອງຫ້ອງພັກຢູ່ໂຮງແຮມແຫ່ງໜຶ່ງ ຮອດເວລາ 1:00 ໂມງ ຂອງວັນທີ 1 ເມສາ 2017 ຈຶ່ງຖືກເຈົ້າໜ້າທີ່ຈັບຕົວແລ້ວກວດຄົ້ນຕົວພົບເຫັນປືນສັ້ນຈຳນວນ 1 ກະບອກ ພ້ອມລູກ 2 ລູກ ແລະ ຢາອີ ຈຳນວນ 8 ເມັດ;

ຕໍ່ມາເຈົ້າໜ້າທີ່ຈຶ່ງໄດ້ທຳການກວດຄົ້ນເຄຫະສະຖານເຮືອນຂອງ ຈຳເລີຍ4 ພົບເຫັນປືນສັ້ນຍີ່ຫໍ້ກັອກ17 ຈໍານວນ 1 ກະບອກ ພ້ອມລູກ ຈຳນວນ 88 ລູກ,ປືນສັ້ນຍີ່ຫໍ້ SIGSAUERJ228 ສີດໍາ1 ກະບອກ ພ້ອມລູກ 9 ລູກ, ປືນສັ້ນຫັນລີ 38 ສີເລດຈຳນວນ 1ກະບອກ ພ້ອມລູກ 5 ລູກ, ລູກປືນສັ້ນບໍ່ຮູ້ຊະນິດຈຳນວນ 42 ລູກ ທີ່ເປັນປືນຂອງ ຈຳເລີຍ1 ຝາກໄວ້ ມາດໍາເນີນຄະດີ.

ທ້າວ ທົງໄຊ (ຈໍາເລີຍ4) ໄດ້ເຄື່ອນໄຫວກະທຳຜິດ ດ້ວຍຮູບການເປັນຄົນຮັບໃຊ້ໃຫ້ແກ່ ຈຳເລີຍ1 ຊຶ່ງສະແດງອອກ ຈໍາເລີຍ4 ຈະເປັນຄົນຕິດຕາມ ຈໍາເລີຍ1ໄປຕາມສະຖານທີ່ຮ້ານອາຫານ ແລະ ຮ້ານບັນເທີງຕ່າງໆ ຊຶ່ງໄປແຕ່ລະຄັ້ງ ຈຳເລີຍ1 ຈະເອົາຢາອີ ມອບໃຫ້ ຈຳເລີຍ4ເປັນຄົນເກັບຮັກສາຄອບຄອງ ເພື່ອເອົາໄວ້ໃສ່ຈອກເຫຼົ້າ ໃຫ້ແກ່ໝູ່ຄູ່ຂອງ ຈໍາເລີຍ1;

ນອກຈາກນີ້, ຈໍາເລີຍ4 ຍັງໄດ້ຮັບເອົາອາວຸດເສີກ ປະເພດປືນ ພ້ອມດ້ວຍລູກປືນ ຈາກຈຳເລີຍ1 ໄປເກັບຮັກສາໄວ້ຢູ່ເຮືອນຂອງຕົນ ແລະ ຍັງພົບຂອງກາງຢາອີ ຈຳນວນ 8 ເມັດ ນໍ້າໜັກ 2,6597 ກຣາມ ແລະ ປືນຈໍານວນ 4 ກະບອກ ຕາມບົດບັນທືກຈັບຕົວ ແລະ ບົດບັນທືກກວດຄົ້ນເຄຫະສະຖານ, ຈຳເລີຍ4ກໍຮັບວ່າ ໄດ້ຄອບຄອງຢາເສບຕິດ (ຢາອີ) ແລະ ມີອາວຸດເສີກໄວ້ໃນຄອບຄອງໂດຍບໍ່ຖືກຕ້ອງຕາມກົດໝາຍແທ້.

ຕາມການພິລາລະນາຂອງຄະນະສານແລ້ວເຫັນວ່າຈໍາເລີຍ4ໄດ້ກະທໍາຜິດຕາມມາດຕາ 2 ຂໍ້ 2 ວັກ 1 ຂອງກົດໝາຍວ່າດ້ວຍການປັບປຸງ ມາດຕາ 146 ຂອງກົດໝາຍອາຍາ ສະບັບປີ 2005 ແລະ ມາດຕາ 75, 76 ຂອງກົດໝາຍວ່າດ້ວຍຢາເສບຕິດປີ 2013; ດັ່ງນັ້ນ, ສານປະຊາຊົນ ນະຄອນຫຼວງວຽງຈັນ ຈຶ່ງຕັດສິນຕັດອິດສະລະພາບ ທ້າວ ທົງໄຊ (ຈໍາເລີຍ4) ຈໍາຄຸກ 7 ປີ ແລະ ປັບໃໝ 12 ລ້ານກີບ.

ข่าวทั่วไป