ຕຽມສ້າງໂຮງໝໍທັນສະໄໝຢູ່ເຂດເສດຖະກິດພິເສດສາມຫຼ່ຽມຄຳ

ຕຽມສ້າງໂຮງໝໍທັນສະໄໝຢູ່ເຂດເສດຖະກິດພິເສດສາມຫຼ່ຽມຄຳ

ໂຮງໝໍສາກົນທິດຕາເວັນອອກລາວ ຢູ່ເຂດເສດຖະກິດສາມຫຼ່ຽມຄຳ ມີແຜນຈະສ້າງຕັ້ງໂຮງໝໍແຫ່ງໃໝ່ໃຫຍ່ທັນສະໄໝສາມາດຮອງຮັບຄົນເຈັບໄດ້ 600 ຕຽງ, ສ້າງ​ເປັນລະບົບຄົບວົງຈອນ, ໃນຂະນະດຽວກັນຄົນເຈັບທີ່ຢູ່ນອກເຂດກໍສາມາດມາບໍລິການປິ່ນປົວໄດ້.

ທ່ານ ຖາງຫຼີ ຜູ້ອຳນວຍການໂຮງໝໍສາກົນທິດຕາເວັນອອກລາວ (ຕັ້ງ​ຢູ່​ເຂດ​ເສດ​ຖະ​ກິດ​ພິ​ເສດ​ສາມຫຼ່ຽມ​ຄຳ) ໄດ້ເປີດ​ເຜີຍຕໍ່ສື່ມວນຊົນ​ເມື່ອ​ບໍ່​ດົນ​ມາ​ນີ້ວ່າ: ໂຮງໝໍສາກົນທິດຕາເວັນອອກລາວ ໄດ້ສ້າງຕັ້ງຂຶ້ນໃນປີ 2015 ປັດຈຸບັນມີບຸກຄະລາກອນທັງໝົດ 78 ຄົນ ໂດຍລວມແມ່ນໃຫ້ບໍລິການປະຊາຊົນທີ່ຢູ່ໃນເຂດເສດຖະກິດພິເສດສາມຫຼ່ຽມຄຳ, ມີຕຽງຮອງຮັບຄົນເຈັບ 60 ຕຽງ.

ທ່ານກ່າວຕື່ມວ່າ: ນັບແຕ່ມີການແຜ່ລະບາດຂອງພະຍາດໂຄວິດ-19 ທາງໂຮງໝໍກໍໄດ້ມີການເກັບຕົວຢ່າງມາກວດຈຳນວນ 3 ແສນຄົນ, ພົບຜູ້ຕິດເຊື້ອ 980 ຄົນ ແລະ ສາມາດປິ່ນ​ປົວຜູ້ປ່ວຍໂຄວິດ-19 ໃຫ້ຫາຍຂາດໄດ້. ໂຮງໝໍ​ຂອງພວກເຮົາໃຫ້ບໍລິການທົ່ວໄປ ມີພະແນກແຂ້ວ, ກວດພາຍໃນ-ພາຍນອກ, ຜະດຸງຄັນ, ພະຍາດຍິງ; ພະນັກງານສ່ວນຫຼາຍຢູ່ໂຮງໝໍແຫ່ງນີ້ແມ່ນຄົນລາວ ສ່ວນທ່ານໝໍແມ່ນຄົນຈີນ;

ພິເສດສຳລັບຄ່າບໍລິການປະຊາຊົນຜູ້ທີ່​ບໍ່ມີເງິນ, ທາງໂຮງໝໍຈະບໍ່ເກັບຄ່າບໍລິການໂດຍທາງສະພາບໍລິຫານເຂດເສດຖະກິດສາມຫຼ່ຽມຄຳຈະເປັນຄົນຈ່າຍໃຫ້ແກ່ໂຮງໝໍ, ສຳລັບພະນັກງານສະພາບໍລິຫານເຂດແມ່ນຈະໄດ້ຮັບສ່ວນຫຼຸດ 50%, ສ່ວນຄົນລາວ ແລະ ຄົນມຽນມາ ແມ່ນໄດ້ຮັບສ່ວນຫຼຸດ 20% ທຸກກໍລະນີ; ສຳລັບນະໂຍບາຍຂອງແພດ-ໝໍ ຫຼື ພີ່ນ້ອງຂອງແພດໝໍ ຖ້າຫາກມີການເຈັບປ່ວຍປິ່ນປົ່ວແມ່ນຈະບໍ່ໄດ້ເສຍຄ່າໃຊ້ຈ່າຍ.

ທ່ານ ຖາງຫຼິນ ໃຫ້ຮູ້ອີກວ່າ: ໃນຕໍ່ໜ້າໂຮງໝໍສາກົນທິດຕາເວັນອອກລາວ ມີແຜນຈະສ້າງ​ເປັນໂຮງໝໍໃຫຍ່ທັນສະໄໝມີ​ປະ​ມານ 600 ຕຽງ ແລະ ​ສ້າງ​ເປັນ​ໂຮງ​ໝໍຄົບວົງຈອນ ​ຊຶ່ງໃນອະນາຄົດຕໍ່ໜ້າ ປະຊາຊົນທີ່ອາໄສຢູ່ນອກເຂດເສດຖະກິດພິເສດສາມຫຼ່ຽມຄຳ ກໍສາມາດມາໃຊ້ບໍລິການໄດ້.

ນາງ ແວວດາວ ແຊຜານ ພະນັກງານຝ່າຍບໍລິຫານຂອງໂຮງໝໍສາກົນທິດຕາເວັນອອກລາວ ທີ່ເຮັດວຽກຢູ່ໂຮງໝໍດັ່ງກ່າວ ກ່າວວ່າ: ຂ້າ​ພະ​ເຈົ້າມາເຮັດວຽກຢູ່ໂຮງໝໍແຫ່ງນີ້ມາເປັນເວລາ 2 ປີ, ພາຍຫຼັງທີ່ຮຽນຈົບແພດທົ່ວໄປ ມາຈາກ ສປ ຈີນ ກໍໄດ້ມີໂອກາດມາສະໝັກວຽກຢູ່ໂຮງໝໍແຫ່ງນີ້ ແລະ ໄດ້ຖືກບັນ​ຈຸ​ເຂົ້າເປັນພະນັກງານນັບແຕ່ນັ້ນມາ ຊຶ່ງຕົນກໍມີຄວາມພາກພູມໃຈຫຼາຍທີ່ໄດ້ມີໂອກາດມາເຮັດວຽກ​ບໍ​ລິ​ການ​ຄົນ​ເຈັບຢູ່ຮງ​ໝໍ​ແຫ່ງນີ້.

ໂຮງ​ໝໍ​ແຫ່ງ​ນີ້​ໄດ້ເປີດໂອກາດໃຫ້ຫຼາຍໆຄົນ ໂດຍສະເພາະນັກສຶກສາທີ່ຮຽນຈົບໃໝ່ ຍັງບໍ່ມີປະສົບການ ແຕ່ມີຄວາມຮູ້ມີຄວາມສາມາດ ຊຶ່ງ​ການ​ທີ່​ໄດ້​ເຂົ້າ​ມາ​ເຮັດ​ວຽກ​ຢູ່​ເຂດ​ເສດ​ຖະ​ກິດ​ພິ​ເສດ​ສາມຫຼ່ຽມ​ຄຳ ກໍ​ຄືໂຮງ​ໝໍ​ແຫ່ງ​ນີ້, ນອກ​ຈາກ​ຈະ​ມີ​ວຽກ​ເຮັດ​ງານ​ທຳ​ທີ່​ຂ້ອນ​ຂ້າງ​ໝັ້ນ​ຄົງ​ແລ້ວ ຍັງສາມາດສ້າງລາຍໄດ້ໃຫ້ຕົວເອງ ແລະ ສົ່ງລາຍໄດ້ໃຫ້ຄອບຄົວສາມາດປັບປຸງຊີວິດການເປັນຢູ່ຂອງຕົນ ແລະ ຄອບຄົວໃຫ້ດີຂຶ້ນເປັນກ້າວໆ.

ข่าวทั่วไป