ປະຫວັດຄວາມເປັນມາຂອງເມືອງຄອບ ແຂວງໄຊຍະບູລີ ( ທີ່ຫຼາຍຄົນບໍ່ທັນຮູ້ມາກ່ອນ )

ປະຫວັດຄວາມເປັນມາຂອງເມືອງຄອບ ແຂວງໄຊຍະບູລີ ( ທີ່ຫຼາຍຄົນບໍ່ທັນຮູ້ມາກ່ອນ )

ເມືອງຄອບ ສ້າງຕັ້ງຂື້ນໃນວັນທີ 14 ພະຈິກ 1992 ເປັນເມືອງໜຶ່ງທີ່ຕັ້ງຢູ່ເໜືອສຸດຂອງແຂວງໄຊຍະບູລີ ຫ່າງຈາກເທດສະບານແຂວງໄປທາງທິດຕາເວັນຕົກປະມານ 250 ກິໂລແມັດ, ເປັນເມືອງທີ່ມີພື້ນທີ່ສະຫຼັບຊັບຊ້ອນ, ມີປ່າໄມ້ທີ່ດົກໜາ, ມີແມ່ນໍ້າຫຼາຍສາຍທີ່ອຸດົມສົມບູນ, ມີທົ່ງພຽງລຽບໄປຕາມຮ່ອມພູຮ່ອມຜາ, ເໝາະສົມກັບການປູກຝັງ ແລະ ລ້ຽງສັດ, ທົ່ວເມືອງມີເນື້ອທີ່ 179 ຕາຕະລາງກິໂລແມັດ, ທິດເໜືອຕິດກັບແມ່ນໍ້າຂອງ ແລະ ເມືອງປາກທາ ແຂວງບໍ່ແກ້ວ, ທິດຕາເວັນອອກຕິດກັບເມືອງຊຽງຮ່ອນ, ທິດຕາເວັນຕົກ ແລະ ທິດໃຕ້ຕິດກັບລາຊະອານາຈັກໄທ ມີຊາຍແດນຍາວເຖິງ 57 ກິໂລແມັດ.


ເມືອງຄອບ ມີທັງໝົດ 28 ບ້ານ, ມີພົນລະເມືອງທັງໝົດ 21.662 ຄົນ , ຍິງ 10.685 ຄົນ ປະກອບມີ 6 ເຜົ່າອາໄສຢູ່ຮ່ວມກັນຄື: ເຜົ່າລື້, ເຜົ່າລາວ, ເຜົ່າຍວນ, ເຜົ່າມົ້ງ, ເຜົ່າກຶມມຸ ແລະ ເຜົ່າໄປ.

ປະຫວັດຄວາມເປັນມາ: ໄດ້ຫຼາຍຮ້ອຍປີມາແລ້ວ ດິນແດນທີ່ອຸດົມສົມບູນແຫ່ງນີ້ ມີຜູ້ຄົນມາອາໄສຢູ່, ເຊິ່ງຜູ້ຄົນດັ່ງກ່າວແມ່ນໄດ້ຍົກຍ້າຍມາຈາກຫຼາຍເຂດແຄ້ວນຄື: ມາຈາກພາກໃຕ້ຂອງປະເທດຈີນ, ພາກເໜືອຂອງປະເທດໄທ ແລະ ມາຈາກປະເທດມ້ຽນມາ.

ຄົນທີ່ມາອາໄສຢູ່ກ່ອນໝູ່ແມ່ນພວກມ່ານ, ພວກງິ້ວທີ່ໄດ້ອົບພະຍົບມາຈາກປະເທດມ້ຽນມາ ແລະ ພາກໃຕ້ຂອງປະເທດຈີນ; ຫຼາຍຮ້ອຍປີຕໍ່ມາພວກມ່ານ ແລະ ພວກງິ້ວ ກໍ່ໄດ້ຍົກຍ້າຍອອກໄປ ຄົງເຫຼືອໄວ້ແຕ່ບ້ານຮ້າງ, ວັດຮ້າງ, ວັດຖຸບູຮານເກົ່າແກ່ ແລະ ຊາກສະຫຼັກຫັກພັງໄວ້ໃຫ້ເຫັນເຊັ່ນ: ພຣະທາດປວກ, ທາດຄໍາ ( ບ້ານນໍ້າຄ່າ ), ທາດມ່ານ ( ບ້ານຖໍ້າ ) ແລະ ຮ່ອງຮອຍປະຫວັດສາດຄື: ຄ້າຍທະຫານເກົ່າຕາມສັນພູຕ່າງໆຫຼາຍແຫ່ງ.


ຕໍ່ຈາກນັ້ນມາ ພວກລື້, ຍວນ ແລະ ລາວ ກໍໄດ້ເຂົ້າມາອາໄສຢູ່ຕາມບ້ານຮ້າງຂອງພວກມ່ານ ແລະ ພວກງິ້ວ, ຊຶ່ງພາກັນມາສ້າງຕັ້ງບ້ານເຮືອນ ຢູ່ບ້ານຫຼັກຄໍາກ່ອນໝູ່. ຕໍ່ມາກໍ່ມີບ້ານສົບປາຍ ( ບ້ານເຄິ່ງຫຼັກຄໍາປັດຈຸບັນ ), ບ້ານດົງຖໍ້່າທອງ, ບ້ານນໍ້າລ້ອມ ( ບ້ານມ່ວງດອນມູນປັດຈຸບັນ ), ບ້ານແຟກ ( ບ້ານສະຖານປັດຈຸບັນ ), ບ້ານນໍ້າພ້າວ, ບ້ານຖໍ້າ, ບ້ານຫ້ວຍເລົາ, ບ້ານປາງໄຮ ແລະ ບ້ານປາກຄອບ.

ປະຊາຊົນດັ່ງກ່າວໄດ້ທໍາມາຫາກິນລຽບຕາມທົ່ງພຽງຮ່ອມພູຜາ, ຕາມສາຍນໍ້າຄອບ, ນໍ້າປາຍ, ນໍ້າພ້າວ, ນໍ້າໂປດ, ນໍ້າຄ່າ, ນໍ້າເລົາ ແລະ ນໍ້າຂອງ ແລ້ວໃສ່ຊື່ເມືອງວ່າ: ເມືອງຂອມໄຂ ທີ່ວ່າການຢູ່ບ້ານດົງຖໍ້າທອງ ( ບ້ານມ່ວງດອນມູນປັດຈຸບັນ ).


ຕາມການຄົ້ນຄວ້າຈາກແຜນສີລາຈາລຶກ ທີ່ໄດ້ຄົ້ນພົບໃນເວລາກໍ່ສ້າງເສັ້ນທາງ ໃນວັນທີ 13 ມັງກອນ 2001 ຢູ່ບ້ານຫົວເມືອງ ດິນແດນແຫ່ງນີ້ມີຄົນອາໄສຢູ່ແຕ່ປີ ຄສ 881 ແລະ ເວລາທີ່ເພິ່ນຂຽນຫີນສີລາຈາລຶກນັ້ນໃນວັນທີ 30 ມັງກອນ ປີຄສ 1520 ໃນເວລານັ້ນເຈົ້າເມືອງມີຊື່ວ່າ: ພະຍາຄອບຫານຈອມສັກ ເຊິ່ງເປັນເຈົ້າປົກຄອງເມືອງຂອມໄຂ.

ພາຍຫຼັງພະຍາໄດ້ສິ້ນພະຊົນແລ້ວ ຈຶ່ງໄດ້ເອົາລູກຊາຍຂື້ນແທນຄື: ພະຍາໝອກຫານຈອມສັກ ແລ້ວໄດ້ປ່ຽນຊື່ ເມືອງຂອມໄຂ ມາເປັນ ເມືອງຄອບ ຕາມຊື່ພໍ່ຂອງຕົນເອງ. ດັ່ງນັ້ນຈຶ່ງເອີ້ນວ່າ: ເມືອງຄອບ ມາເຖິງປັດຈຸບັນນີ້.


ຮຽບຮຽງ-ຮູບພາບໂດຍ: ພົມມະນີ ອິນສະຫວັນ
020 55390276
ອ້າງອີງ: 20 ປີ ແຫ່ງການກໍາເນີດ, ການເຕີບໃຫຍ່ ແລະ ການຂະຫຍາຍຕົວຂອງເມືອງຄອບ.
ຂໍ້ມູນຈາກເພຈ
#ສະຖານີວິທະຍຸເມືອງຄອບແຂວງໄຊຍະບູລີ

ข่าวทั่วไป