ລັດວິສາຫະກິດໄຟຟ້າລາວ ຈະມີການປະຕິຮູບຄືນໃຫ່ມ

ລັດວິສາຫະກິດໄຟຟ້າລາວ ຈະມີການປະຕິຮູບຄືນໃຫ່ມ

ພິທີປະກາດການຈັດຕັ້ງຄະນະປະຕິຮູບລັດວິສາຫະກິດໄຟຟ້າລາວ ໄດ້ຈັດຂຶ້ນໃນວັນທີ 22 ເມສາ ຜ່ານມານີ້ ທີ່ຫ້ອງປະຊຸມຂອງລັດວິສາຫະກິດດັ່ງກ່າວ, ພາຍໃຕ້ການເປັນປະທານຂອງທ່ານ ດາວວົງ ພອນແກ້ວ ລັດຖະມົນຕີກະຊວງພະລັງງານແລະ ບໍ່ແຮ່, ທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ໄດ້ຜ່ານຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍ ການແຕ່ງຕັ້ງຄະນະປະຕິຮູບລັດວິສາຫະກິດໄຟຟ້າລາວ ຊຶ່ງປະກອບດ້ວຍບັນດາທ່ານ ຄື: ທ່ານ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ ເປັນຫົວໜ້າຄະນະ; ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ເປັນຮອງຫົວໜ້າຄະນະ; ທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ລັດວິສາຫະກິດໄຟຟ້າລາວ ເປັນຄະນະ; ທ່ານ ສຸລິວັດ ສຸວັນນະຈູມຄໍາ ຫົວໜ້າກົມຄຸ້ມຄອງໜີ້ສິນສາທາລະນະ ກະຊວງການເງິນ ເປັນຄະນະ;

ທ່ານ ສອນເພັດ ອິນທະວົງ, ຫົວໜ້າກົມປະຕິຮູບລັດວິສາຫະກິດ ແລະ ປະກັນໄພ ກະຊວງການເງິນ ເປັນຄະນະ; ທ່ານ ສົມພິດ ແກ້ວວິຈິດ ຫົວໜ້າກົມທຸລະກິດພະລັງງານ ກະຊວງພະລັງງານແລະ ບໍ່ແຮ່ ເປັນຄະນະ; ທ່ານ ພູເພັດ ກ້ຽວພິລາວົງ, ຄະນະບໍດີ ຄະນະເສດຖະສາດ ແລະ ບໍລິຫານທຸລະກິດ ມະຫາວິທະຍາໄລແຫ່ງຊາດ ເປັນຄະນະ;

ທ່ານ ນາງ ເຄືອວັນ ຈັນທະພູວົງ ຮອງຫົວໜ້າກົມພັດທະນາການບໍລິຫານລັດ ກະຊວງພາຍໃນ ເປັນຄະນະ ແລະ ທ່ານ ບຸນເອື້ອ ສີວັນເພັງ ຫົວໜ້າຝ່າຍບໍລິຫານ ປະທານສະຫະພັນກໍາມະບານ ລັດວິສາຫະກິດໄຟຟ້າລາວ ເປັນຄະນະ.

ທ່ານ ດາວວົງ ພອນແກ້ວ ກ່າວວ່າ: ລັດວິສາຫະກິດໄຟຟ້າລາວ ໃນຖານະທີ່ເປັນຫົວໜ່ວຍວິສາຫະກິດ ທີ່ເປັນພື້ນຖານສໍາຄັນໃນລະບົບເສດຖະກິດແຫ່ງຊາດຢູ່ປະເທດ.

ສະນັ້ນ ການປະຕິຮູບລັດວິສາຫະກິດໄຟຟ້າລາວ ໃຫ້ສອດຄ່ອງ ກັບສະພາບ ຄວາມຮຽກຮ້ອງຕ້ອງການ ແລະ ໜ້າທີ່ການເມືອງຂອງພັກໃນໄລຍະໃໝ່ ແມ່ນມີຄວາມສໍາຄັນ ແລະ ຈໍາເປັນພາວະວິໄສ ຊຶ່ງການປະຕິຮູບລັດວິສາຫະກິດໄຟຟ້າລາວ ກໍແມ່ນນອນຢູ່ໃນຂະບວນວິວັດຂອງການປັບປຸງລັດວິສາຫະກິດຢູ່ປະເທດລາວໃນໄລຍະໃໝ່, ແນໃສ່ ເພື່ອບັນລຸທິດທາງ ແລະ ຄາດໝາຍ ກ່ຽວກັບການປັບປຸງວິສາຫະກິດ ທີ່ພັກໄດ້ວາງອອກ ຢູ່ໃນມະຕິກອງປະຊຸມໃຫຍ່ຄັ້ງທີ XI ຂອງພັກທີ່ວ່າ:

“ກໍານົດແຈ້ງ ແລະ ປະຕິບັດເຂັ້ມງວດຫຼັກການຈັດຕັ້ງ ແລະ ການເຄື່ອນໄຫວທີ່ທັງຮັບປະກັນການປົກປ້ອງຊັບສິນຂອງລັດ ບໍ່ໃຫ້ຕົກເຮ່ຍເສຍຫາຍ, ປະຕິບັດການຄຸ້ມຄອງຕາມກົນໄກເສດຖະກິດຕະຫຼາດ, ປັບປຸງໂຄງສ້າງດ້ານການຈັດຕັ້ງ ປະຕິບັດກົນໄກຄຸ້ມຄອງວິສາຫະກິດທີ່ມີການໄລ່ລຽງທຸລະກິດສອດຄ່ອງກັບກົດເກນຕະຫຼາດ, ສ້າງສະພາບແວດລ້ອມ ແລະ ເງື່ອນໄຂໃໝ່ໃຫ້ແກ່ການປັບປຸງ, ພັດທະນາລັດວິສາຫະກິດໃຫ້ມີຄວາມເຂັ້ມແຂງ ແລະ ມີປະສິດທິຜົນ ທັງເພື່ອຢຸດຕິ ແລະ ສະກັດກັ້ນການເກີດສະພາບບໍລິຫານເກື້ອກູນ, ການຟຸ່ມເຟືອຍຊັບສົມບັດຂອງລັດ ແລະ ລວມໝູ່, ລຶບລ້າງທຸກອະພິສິດ ແລະ ຜົນປະໂຫຍດພິເສດຂອງບາງກຸ່ມຄົນ”

ພ້ອມທັງສຸມໃສ່ຈັດຕັ້ງປະຕິບັດ 2 ວາລະແຫ່ງຊາດ ຄື: ການແກ້ໄຂສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ.

ອັນນີ້ ແມ່ນໜ້າທີ່ ແລະ ຄວາມຮັບຜິດຊອບລວມທົ່ວສັງຄົມ ຊຶ່ງຂະແໜງພະລັງງານ ແລະ ບໍ່ແຮ່ ກໍຄື ລັດວິສາຫະກິດໄຟຟ້າລາວ ແມ່ນຂະແໜງການ ແລະ ຫົວໜ່ວຍທີ່ຈະຕ້ອງເຂົ້າຮ່ວມຢ່າງຕັ້ງໜ້າ ຊອກຫາວິທີສ້າງລາຍຮັບເພື່ອແກ້ໄຂບັນຫາໜີ້ສິນຂອງໄຟຟ້າລາວ.

ທ່ານ ດາວວົງ ພອນແກ້ວ ຍັງກ່າວຕື່ມວ່າ: ເຊື່ອໝັ້ນວ່າ ຄະນະຮັບຜິດຊອບການປະຕິຮູບໄຟຟ້າລາວ ຈະສຸມຄວາມພະຍາຍາມ, ຄວາມຮູ້, ຄວາມສາມາດ, ບົດຮຽນ ແລະ ປະສົບການທີ່ມີຢູ່ ເຂົ້າໃນການປະຕິຮູບ ໃຫ້ຖືກຕ້ອງ ແລະ ຄົບຖ້ວນ ແລະ ກາຍເປັນພື້ນຖານໃຫ້ແກ່ການຈັດຕັ້ງ ແລະ ການເຄື່ອນໄຫວດໍາເນີນທຸລະກິດຂອງໄຟຟ້າລາວຢ່າງມີຄຸນນະພາບ, ມີການຫັນປ່ຽນ ແລະ ປະສິດທິຜົນສູງຂຶ້ນ

ສາມາດຮອງຮັບຄວາມຮຽກຮ້ອງຕ້ອງການໃນການຈັດຕັ້ງປະຕິບັດບົດບາດ, ໜ້າທີ່ໃນຖານະທີ່ເປັນຫົວໜ່ວຍທຸລະກິດໄດ້ຢ່າງໜັກແໜ້ນ ແລະ ຕໍ່ເນື່ອງ, ປະກອບສ່ວນເຂົ້າໃນຜົນສໍາເລັດລວມຂອງການພັດທະນາປະເທດໃນໄລຍະໃໝ່ ແລະ ຮຽກຮ້ອງໃຫ້ຄະນະປະຕິຮູບທຸກທ່ານ ຈົ່ງເອົາໃຈໃສ່ປະຕິບັດໜ້າທີ່ວຽກງານຂອງຕົນດ້ວຍຄວາມຕັ້ງໜ້າ, ພ້ອມກັນບຸກບືນສູ້ຊົນຜ່ານຜ່າຄວາມຫຍຸ້ງຍາກເພື່ອເຮັດສໍາເລັດໜ້າທີ່ອັນມີກຽດທີ່ພັກ, ລັດ ມອບໝາຍໃຫ້.

ຂ່າວ-ພາບ: ນາງແສງຈັນ

ข่าวทั่วไป