ข่าวทั่วไป

ຢູມັນນີ ສໍາເລັດການເບີກຈ່າຍເງິນອຸດໜູນ ງວດທີ1 ຢູ່ 4 ແຂວງພາກເໜືອ

ຢູມັນນີ ສໍາເລັດການເບີກຈ່າຍເງິນອຸດໜູນ ງວດທີ I ຢູ່ 4 ແຂວງພາກເໜືອ

ຂປລ. ເມື່ອບໍ່ດົນມານີ້, ບໍລິສັດສະຕາຟິນເທັກ ຫລື ຢູມັນນີ (u-money) ສຳເລັດການເບີກຈ່າຍເງິນອຸດໜູນ ໃນໂຄງການຫລຸດຜ່ອນຄວາມທຸກຍາກ ແລະ ການຂາດໂພຊະນາການໃນເຂດຊົນນະບົດ, ກະຊວງກະສິກຳ ແລະ ປ່າໄມ້, ງວດທີ I ຢູ່ 4 ແຂວງພາກ ເໜືອຄື: ແຂວງຜົ້ງສາລີ, ອຸດົມໄຊ, ຫົວພັນ ແລະ ຊຽງແຂວງ ພາຍຫລັງເລີ່ມປະຕິບັດມາແຕ່ຕົ້ນເດືອນມິຖຸນາ 2021, ມີທັງໝົດ 12 ເມືອງ, 241 ບ້ານ 3.861 ຄົນ ລວມເງິນທີ່ໄດ້ເບີກຈ່າຍທັງໝົດ 1,3 ຕື້ກວ່າກີບ. ໃນນີ້, ປະຊາຊົນຜູ້ທຸກຍາກຈະໄດ້ຮັບເງິນ 180.000 ກີບ/ຄົນ/ເດືອນ ໂດຍໄດ້ເບີກຈ່າຍເປັນງວດ 2 ເດືອນຈ່າຍເທື່ອໜຶ່ງ.

ໂຄງການດັ່ງກ່າວໄດ້ ເຊັນສັນຍາໃນເດືອນ ກຸມພາ 2021 ລະຫວ່າງ ບໍລິສັດສະຕາຟິນເທັກ ໂດຍພາຍໃຕ້ເຄື່ອງໝາຍການຄ້າ ຢູມັນນີ ເເລະ ກະຊວງກະສິກຳ ແລະ ປ່າ ໄມ້ ໂດຍມີຈຸດປະສົງເພື່ອນໍາໃຊ້ຊ່ອງທາງຢູມັນນີ ໃນການເບີກຈ່າຍເງິນອຸດໜູນແບບມີເງື່ອນໄຂໃຫ້ແກ່ຜູ້ໄດ້ຮັບຜົນປະໂຫຍດ ຂອງໂຄງການຫລຸດຜ່ອນຄວາມທຸກຍາກ ແລະ ການຂາດໂພຊະນາການໃນເຂດຊົນນະບົດ, ດ້ວຍເປົ້າໝາຍການເບີກຈ່າຍໃຫ້ແກ່ຜູ້ໄດ້ຮັບຜົນປະໂຫຍດ ເຊິ່ງເປັນຄອບຄົວທີ່ທຸກຍາກ ແລະ ຫາກໍພົ້ນທຸກ ຈຳນວນ 42.000 ຄົນ, ຕົກເປັນມູນຄ່າທັງໝົດ 14 ລ້ານກວ່າໂດລາສະຫະລັດ ພາຍໃນ 4 ປີ.

ນອກນັ້ນ, ໃນທ້າຍເດືອນເມສາ ຜ່ານມາ, ກໍໄດ້ມີການເຊັນສັນຍາ ລະຫວ່າງ ກະ ຊວງແຮງງານ ແລະ ສະຫວັດດີການສັງຄົມ ແລະ ບໍລິສັດ ສະຕາຟິນເທັກຈໍາກັດຜູ້ດຽວ ໃນໂຄງການການເບີກຈ່າຍເງິນອຸດໜູນ ໃຫ້ແກ່ແມ່ຍິງຖືພາ ແລະ ເດັກກ່ອນໄວຮຽນ (ອາຍຸຕໍ່າກວ່າ 6 ເດືອນ) ຜ່ານບໍລິການu-money ຢູ່ ເມືອງສະໜາມໄຊ ແຂວງອັດຕະປືແລະ ເມືອງນອງ ແຂວງສະຫວັນນະເຂດ, ເຊິ່ງການເບີກຈ່າຍເງິນຊ່ວຍເຫລືອໃນຄັ້ງນີ້, ຜູ້ໄດ້ຮັບການຊ່ວຍເຫລືອ ຈະໄດ້ຮັບເງິນ 150.000 ກີບ/ຄົນ/ເດືອນ ຕົກເປັນມູຍຄ່າ 3,7 ຕື້ກວ່າກີບ ໂດຍເລີ່ມຈັດຕັ້ງປະຕິບັດແຕ່ກາງ ປີ 2021 ຈົນເຖິງທ້າຍ ປີ 2022 ເປັນໄລຍະເວລາ 18 ເດືອນ ໂດຍນຳໃຊ້ການເບີກຈ່າຍ ຜ່ານບໍລິການ u-money ເຊິ່ງຈະຊ່ວຍໃຫ້ກຸ່ມເປົ້າໝາຍທີ່ໄດ້ຮັບຜົນປະໂຫຍດ ຮັບເງິນໄດ້ທ່ວງທັນເວລາ ແລະ ໄດ້ຮັບເງິນສະຫວັດດີການໂດຍກົງ.

ການປະສານງານກັບ u-money ໃນການເບີກຈ່າຍເງິນ ແກ່ປະຊາຊົນ ຈະຊ່ວຍໃຫ້ປະຊາຊົນທີ່ດໍາລົງຊີວິດໃນຕ່າງແຂວງ ໄດ້ຮັບເງິນອຸດໜູນໂດຍກົງ ເນື່ອງຈາກປະຊາຊົນໃນໂຄງການດັ່ງກ່າວ ແມ່ນອາໃສຢູ່ເຂດຊົນນະບົດ ແລະ ຫ່າງໄກສອກຫລີກ, ການເດີນທາງໄປ-ມາ ມີຄວາມຫຍຸ້ງຍາກດ້ານພາຫະນະ, ເສັ້ນທາງ ແລະ ອື່ນໆ, ການນໍາໃຊ້ຊ່ອງທາງ u-mone yຈະຊ່ວຍໄດ້ຫລາຍແກ່ປະຊາຊົນໃນໂຄງການ ໄດ້ຮັບຜົນປະໂຫຍດທັນເວລາ ແລະ ປອດໄພບໍ່ເສຍເວລາຫລາຍ.
ຢູມັນນີ ສາມາດເຮັດທຸລະກໍາໄດ້ຫລາຍຢ່າງ ກາຍເປັນຊ່ອງທາງທີ່ດີທີ່ສຸດແກ່ຄົນຍຸກໃໝ່. ນອກຈາກການຊໍາລະ ຫລື ໂອນແລ້ວ ກໍສາມາດນໍາໃຊ້ເປັນຊ່ອງທາງໂອນໃນຈຸດປະສົງອື່ນໄດ້ເຊັ່ນກັນ, ໃນເດືອນທັນວາ ປີ 2020 ຢູນີເທວ ກໍໄດ້ນໍາໃຊ້ ຢູມັນນີ ເພື່ອເປັນຊ່ອງທາງໃນການໂອນເງິນຊ່ວຍເຫລືອ ຜູ້ປະສົບໄພນ້ຳຖ້ວມ ທີ່ແຂວງສະຫວັນນະເຂດມູນຄ່າທັງໝົດ 500 ລ້ານກີບ ໂອນເຂົ້າເບີມືຖືຂອງປະຊາຊົນທີ່ປະສົບໄພຈໍານວນ 1.200 ຄອບຄົວ ໂດຍທຸກຄົນສາມາດມາດຖອນເງິນດັ່ງກ່າວ ໄດ້ໂດຍກົງກັບພະນັກງານຢູນີເທວ ຫລື ຕົວແທນຜູ້ໃຫ້ບໍລິການ ຢູມັນນີ ສ້າງຄວາມສະດວກສະບາຍຫລາຍແກ່ພໍ່ແມ່ ປະຊາ ຊົນ ທີ່ໄດ້ຮັບເງິນໂດຍກົງ, ວ່ອງໄວ ແລະ ປອດໄພ.

ຂໍຂອບໃຈ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *