ข่าวทั่วไป

ປກສ ນວ ປະກາດຍົກຂັ້ນເງິນເດືອນ, ເລື່ອນຊັ້ນໃຫ້ນາຍ ແລະ ພົນຕໍາຫຼວດ

ປກສ ນວ ປະກາດຍົກຂັ້ນເງິນເດືອນ, ເລື່ອນຊັ້ນໃຫ້ນາຍ ແລະ ພົນຕໍາຫຼວດ

ປກສ ນະຄອນຫຼວງວຽງຈັນ ປະກາດການຍົກຂັ້ນເງິນເດືອນ, ເລື່ອນຊັ້ນໃຫ້ນາຍ ແລະ ພົນຕໍາຫຼວດ ທີ່ຂຶ້ນກັບກຳລັງ ປກສ ນວ, ໃນວັນທີ 26 ມີນາ 2021 ຜ່ານມາຢູ່ສະໂມສອນ ປກສ ນວ ໂດຍການເປັນປະທານ ແລະ ໃຫ້ກຽດຂຶ້ນປະດັບຊັ້ນຂອງ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນວ, ມີບັນດາຄະນະພັກ-ຄະນະບັນຊາ, ຄະນະຫ້ອງ, ກອງພັນ, ຄ້າຍຄຸມຂັງ-ດັດສ້າງ, ກອງບັນຊາການ ປກສ ເມືອງ ແລະ ພະນັກງານ-ນັກຮົບ 224 ສະຫາຍ, ຍິງ 52 ສະຫາຍ ເຂົ້າຮ່ວມ.

ໃນພິທີ ພັທ ນາງ ບົວລະພັນ ທິລະສັກ ຫົວໜ້າຫ້ອງການເມືອງ ປກສ ນວ ໄດ້ຜ່ານຂໍ້ຕົກລົງເລກທີ 160/ປກສ ລົງວັນທີ 20 ມັງກອນ 2021 ວ່າດ້ວຍການປະຕິບັດນະໂຍບາຍ ຍົກຂັ້ນເງີນເດືອນໃຫ້ນາຍຕໍາຫຼວດ ກອງບັນຊາການ ປກສ ນວ ໄດ້ຍົກຂັ້ນເງິນເດືອນຊັ້ນ ພັທ ຂຶ້ນກິນເງິນເດືອນ ຊັ້ນ ພັອ 4 ສະຫາຍ ແລະ ຜ່ານຂໍ້ຕົກລົງເລກທີ 543 – 545/ປກສ ລົງວັນທີ 09 ມີນາ 2021, ຂໍ້ຕົກລົງເລກທີ 712/ກມປສ ລົງວັນທີ 10 ມີນາ 2021, ຂໍ້ຕົກລົງເລກທີ 1596/ປກສ.ນວ ລົງວັນທີ 18 ມີນາ 2021 ວ່າດ້ວຍການເລື່ອນຊັ້ນໃຫ້ນາຍຕໍາຫຼວດ ກອງບັນຊາການ ປກສ ນວ, ໃນນີ້ໄດ້ເລື່ອນຊັ້ນ ພັຕ ຂຶ້ນຊັ້ນ ພັທ ຈໍານວນ 67 ສະຫາຍ, ຍິງ 5 ສະຫາຍ; ຮອ ຂຶ້ນຊັ້ນ ພັຕ 77 ສະຫາຍ, ຍິງ 17 ສະຫາຍ; ເລື່ອນຊັ້ນ ຮທ ຂຶ້ນຊັ້ນ ຮອ 98 ສະຫາຍ, ຍິງ 29 ສະຫາຍ; ເລື່ອນຊັ້ນ ຮຕ ຂຶ້ນຊັ້ນ ຮທ 79 ສະຫາຍ, ຍິງ 23 ສະຫາຍ; ເລື່ອນຊັ້ນວາທີຮ້ອຍຕີ ຂຶ້ນຊັ້ນ ຮຕ 29 ສະຫາຍ, ຍິງ 10 ສະຫາຍ; ເລື່ອນຊັ້ນສິບເອກ ຂຶ້ນຊັ້ນວາທີຮ້ອຍຕີ 3 ສະຫາຍ, ເລື່ອນຊັ້ນສິບໂທ ຂຶ້ນເປັນຊັ້ນສິບເອກ 2 ສະຫາຍ.

ໃນຕອນທ້າຍພິທີ, ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການ ປກສ ນວ ໄດ້ສະແດງຄວາມຍໍຍ້ອງຊົມເຊີຍ ນຳບັນດາສະຫາຍທີ່ໄດ້ຮັບການເລື່ອນຊັ້ນຄັ້ງນີ້ ພ້ອມເນັ້ນໃຫ້ ນາຍ ແລະ ພົນຕຳຫຼວດ ປກສ ນວ ຕ້ອງເອົາໃຈໃສ່ຄື:

1. ຮຽກຮ້ອງບັນດາສະຫາຍນາຍ ແລະ ພົນຕຳຫຼວດໃນກຳລັງ ປກສ ນວ ເອົາໃຈໃສ່ປັບປຸງ-ຫັນປ່ຽນແນວຄິດ, ຄວາມຮັບຮູ້ຂອງຕົນເອງໃຫ້ມີຄວາມເປັນເອກະພາບນຳການນຳພາຂອງການຈັດຕັ້ງພັກ-ລັດ, ຖືເອົາແນວທາງ-ນະໂຍບາຍ, ທິດຊີ້ນຳຂອງການຈັດຕັ້ງພັກ-ລັດແຕ່ລະຂັ້ນເປັນບ່ອນອີງໃນການເຄື່ອນໄຫວເຮັດໜ້າທີ່ວຽກງານ, ຄວາມເປັນເອກະພາບຂອງບັນດາສະຫາຍຕ້ອງໃຫ້ສະແດງອອກຜ່ານການກະທຳ ແລະ ທັດສະນະຕົວຈິງຫາກບໍ່ແມ່ນເວົ້າຊື່ໆ.

2. ສະເໜີບັນດາສະຫາຍຍົກສູງຄວາມຮັບຜິດຊອບຂອງຕົນໃນການຈັດຕັ້ງປະຕິບັດມະຕິ, ຄຳສັ່ງ, ໜ້າທີ່ວຽກງານທີ່ໄດ້ຮັບມອບໝາຍ, ເພີ່ມທະວີການເຄື່ອນໄຫວໜ້າທີ່ວິຊາສະເພາະ ແລະ ບໍລິການຮັບໃຊ້ປະຊາຊົນດ້ວຍຄວາມບໍລິສຸດໃຈ, ເດັດດ່ຽວຈຳກັດ ແລະ ຕ້ານການສວຍໃຊ້ໜ້າທີ່ຕຳແໜ່ງຫາຜົນປະໂຫຍດໂດຍບໍ່ຊອບທຳ.

3. ຮຽກຮ້ອງມາຍັງບັນດາສະຫາຍ ນາຍ ແລະ ພົນຕຳຫຼວດ ໃນກຳລັງ ປກສ ນວ ຕ້ອງພ້ອມກັນເປັນເຈົ້າການແກ້ໄຂບັນດາປະກົດການຫຍໍ້ທໍ້, ສິ່ງທີ່ບໍ່ສອດຄ່ອງທີ່ນອນຢູ່ໃນຂອບເຂດຄວາມຮັບຜິດຊອບຂອງຕົນໃຫ້ຕົກໄປ, ສ້າງການຫັນປ່ຽນໃໝ່ໃນກຳລັງ ປກສ ນວ ໃຫ້ສົມຄູ່ກັບເປັນກຳລັງປ້ອງກັນຄວາມສະຫງົບ ນະຄອນຫຼວງວຽງຈັນ.

4. ສະເໜີມາຍັງບັນດາສະຫາຍທີ່ໄດ້ຮັບເລື່ອນຊັ້ນໃນຄັ້ງນີ້ ໃຫ້ຕັ້ງໜ້າເສີມຂະຫຍາຍມູນເຊື້ອທີ່ດີ ແລະ ເອົາໃຈໃສ່ແກ້ໄຂຂໍ້ຄົງຄ້າງຂອງຕົນ, ພ້ອມກັນນັ້ນກໍ່ໃຫ້ເພີ່ມທະວີຝຶກຝົນຫໍຼ່ຫຼອມຕົນເອງ ຊອກຮູ້ຮ່ຳຮຽນທາງດ້ານທິດສະດີ ແລະ ໃນພຶດຕິກຳຕົວຈິງ, ສ້າງຕົນເອງໃຫ້ກາຍເປັນຜູ້ຊີ້ນຳ-ບັນຊາ ແລະ ເປັນວິຊາການທີ່ເປັນມືອາຊີບ ສົມຄູ່ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນເງື່ອນໄຂໃໝ່, ຕັ້ງໜ້າຮັກສາຄວາມສາມັກຄີເອກະພາບພາຍໃນໃຫ້ດີ.

ຂໍຂອບໃຈ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *