ข่าวทั่วไป

ຂ່າວດີແຂວງຈໍາປາສັກ ມື້ນີ້ປິ່ນປົວຜູ້ຕິດເຊື້ອຫາຍດີເພີ່ມ 11 ຄົນ

ຂ່າວດີແຂວງຈໍາປາສັກ ມື້ນີ້ປິ່ນປົວຜູ້ຕິດເຊື້ອຫາຍດີເພີ່ມ 11 ຄົນ

Champasak RADIO Station100,7 Mhz ລາຍງານວ່າ: ໃນຕອນເຊົ້າວັນທີ 17 ພຶດສະພາ 2021 ທີ່ພະແນກສາທາລະນະສຸກແຂວງຈໍາປາສັກ, ທ່ານ ດຣ ນາງ ຈັນປະສົງ ຈຽມສີສຸລາດ ຮອງຜູ້ອໍານວຍການ ໂຮງໝໍແຂວງຈໍາປາສັກ ຜູ້ຮັບຜິດຊອບສູນປິ່ນປົວໂຄວິດ-19 ຢູ່ໂຮງໝໍພາກສະໜາມ ຕ່າງໜ້າຄະນະສະເພາະກິດຂັ້ນແຂວງເພື່ອປ້ອງກັນ,ຄວບຄຸມ ແລະ ແກ້ໄຂການລະບາດພະຍາດໂຄວິດ-19 ໄດ້ຖະແຫຼງຂ່າວປະຈຳວັນວ່າ: ໃນວັນທີ17 ພຶດສະພາ ແຂວງຈໍາປາສັກມີຜູ້ຕິດເຊື້ອໃໝ່ 3 ຄົນ ເປັນແຮງງານລາວເຂົ້າມາຈາກປະເທດເພື່ອນບ້ານທັງໝົດ ໃນນັ້ນມີ ປະຊາຊົນບ້ານເຊລະບໍາ ເມືອງຊະນະສົມບູນ 1 ຄົນ, ບ້ານທາງຄົບເມືອງຈໍາປາສັກ 1 ຄົນ ແລະ ບ້ານຝັ່ງແດງ ເມືອງໂພນທອງ 1 ຄົນ.

ມາຮອດມື້ນີ້ ເປັນເວລາ 10 ວັນແລ້ວບໍ່ມີການຕິດເຊື້ອຢູ່ໃນຊຸມຊົນ. ສ່ວນການປິ່ນປົວໄດ້ມີຜູ້ປິ່ນດີ ແລະອອກໂຮງໝໍວັນທີ 17 ພຶດສະພາຕື່ມຈໍານວນ 11 ຄົນ ລວມຕົວເລກສະສົມປິ່ນປົວດີ ແລະ ອອກໂຮງໝໍແລ້ວທັງໝົດ 82 ຄົນ.

ສໍາລັບການປິ່ນປົວຜູ່ຕິດເຊື້ອ ສ່ວນຫຼາຍແມ່ນມີອາການເບົາບາງ ຊຶ່ງປົວຢູ່ໂຮງໝໍພາກສະໜາມວິທະຍາໄລການເງິນພາກໃຕ້ ສ່ວນຜູ້ທີ່ມີອາການປານກາງມີ 2 ຄົນແມ່ນຍັງສືບຕໍ່ປິ່ນປົວຢູ່ໂຮງໝໍເມືອງໂພນທອງ ,ໃນນັ້ນ 1 ກໍລະນີມີອາການໜ້າເປັນຫ່ວງ ຊຶ່ງແມ່ນເພດຍິງທີ່ຖືພາໄດ້ 5 ເດືອນ ເຊິ່ງແພດໝໍ ແລະຊ່ຽວຊານຫວຽດນາມໄດ້ສຸມໃສ່ໃນການປິ່ນປົວຢ່າງໃກ້ຊິດ.

ທ່ານ ດຣ ນາງ ຈັນປະສົງ ຈຽມສີສຸລາດ ຮອງຜູ້ອໍານວຍການໂຮງໝໍແຂວງຈໍາປາສັກຍັງໄດ້ກ່າວວ່າ ສະພາບການປິນປົວ ຄົນທີ່ມີອາການເບົາບາງ ໝາຍຄວາມວ່າຜູ້ຕິດເຊື້ອບໍ່ມີອາການຫຍັງ ແມ່ນປິ່ນປົວທີ່ໂຮງໝໍພາກສະໜາມວິທະຍາໄລການເງິນພາກໃຕ້, ແລະການປິ່ນປົວກໍມີຄວາມສະດວກ. ສ່ວນ 2 ຄົນອາການປານກາງ ປົວຢູ່ໂຮງໝໍເມືອງໂພນທອງ ໃນນັ້ນ 1 ຄົນທີອາການເລີ່ມໜັກແມ່ນໃຫ້ກິນຢາຕ້ານໄວຣັດ,ໃສ່ອົກຊີ ແລະ ຢູ່ໃນຄວາມດູແລຂອງແພດໝໍຢ່າງເອົາໃຈໃສ່.

ຂໍຂອບໃຈ

ใส่ความเห็น

อีเมลของคุณจะไม่แสดงให้คนอื่นเห็น ช่องข้อมูลจำเป็นถูกทำเครื่องหมาย *